Dayak patut nguna teknologi ngerembaika dagang

KUCHING: Bala pedagang menua tu kelebih agi komuniti Dayak patut nguna pengelebih teknologi ba pengawa ngereambaika dagang sida.

Kaban Parlimen Puncak Borneo Willie Mongin madahka dagang ngena aplikasyen baka whatsapp enggau e-dagang siti jalai ti manah dikena makitka produk menua tu ngagai menua luar.

“Nengah teknologi tu, produk kitai ulih datai ba makit domestik lalu udah nya ngagai makit luar.

“Aku meransang pedagang Dayak, enti kita begunaka bantu kitai ulih bekerejasama dalam pengawa meri kus makit enggau e-dagang ngambika ulih ngansag penau dikembuan bala nembiak enggau bini orang ti deka ngereja pengawa dagang,” ku iya.

Willie madah munyi nya lebuh bejadika Pampang Keterubah Produk Nang Ori di Kuching Sentral ditu, kemari.

Nangkan nya ku iya, kus makit enggau e-dagang ulih mantu ngemanahka strategi makit produk sida ke bedagang tu.

“Nya alai aku ngarapka anak Dayak seruran chakah bedagang ukai semina nengah produk Nang Ori tu, tang mega produk bukai.

“Taja produk kitai tu semina produk kampung, tang tu ulih meri penguntung ti besai.

“Anang ngemaruhka produk kampung tu laban sida tu baka belian ke apin dilap,” ku iya.

Willie mega minta ngambika produk menua baka Nang Ori ulih meri peransang ngagai komuniti Dayak seruran chakah dalam sektor dagang.

Berebak enggau nya, penumbuh Nang Ori Awaeang Kwasin madahka pampang keterubah nya dipilih di Kuching Sentral berindik ari endur ti engkeman, nyamai alai parking kerita dereta jam operasyen ti strategik.

“Pampang tu mega dibuka laban mayuh ejen kami ti ngambi stok jauh ngagai opis kami sebedau tu,” ku iya.
“Pembukaan cawangan ini juga berikutan daripada keluhan para ejen kami yang terpaksa mengambil stok di lokasi pejabat sebelum ini yang agak jauh,” katanya.

Nang Ori ngepunka dagang produk enggau lada chelum tu udah nyual produk ba kedai mit, bala bakih sereta mit besai di selampur Sarawak.

“Taun tu aku nagit ulih mai produk lada Sarawak ngagai makit Asia.

“Baka ke seharitu mega, kami bejadika empat produk baru Nang Ori iya nya ai irup Cappucino, ai irup bepengerai enggau pemakai agari-agar ti ulih diempa semua renggat umur nyengkaum anak mit,” ku iya.

Ba pengawa nya kemari, Nang Ori mega bejadika 30 Days Challenge kelebih agi ungkup sida ke deka nguruska diri sereta ngembuan tubuh gerai ngena produk Nang Ori.

Suara Sarawak