DBK Miri nganjung bantu ke Rh Jeff Anchum

MARUDI: Serakup Dayak Bukit Kalingkang (DBK) Pampang Miri mujur nganjung bantu ngagai peranak Rumah Jeff Anchum, Bukit Limau A, Tinjar ditu kena Hari Minggu tu tadi.

Pemungkal begulai DBK, Insol Harry madahka raban betuaika Joyce Hitler Guddy enggau John Bell Ingol ngatur pejalai bepelasarka pemutus aum sida sebuat sebedau nya.

“Bisi 12 iku tubuh bala kami kin nyengkaum Joyce enggau John, ngena empat buah entukar 4WD; dua buah double cabin enggau dua buah single cabin.

“Sida tu ngundan utai bantu baka berau, mi enggau ai irup kelimpah gari ke bisi dua guni enggau tiga kutak besai betengahka jalai batang,” ku iya lebuh dirandau Suara Sarawak tadi.

Insol madah, sida Joyce sebuat napi pemar ngenataika diri din laban jalai batang ngelawa rumah panjai nya agi luchak enggau lichau bekau ujan kandang beberapa hari ke udah.

“Nya kebuah pejalai sida kin baka enda berumban, bela bejimat deriba nangika pengelikun diri empu, nyau lima hari udah penusah nyadi baru bekira ngesah kin.

“Kami ukai enda beratka penusah sida nya serumah tang begunaka awak endur ngumpul bantu baka bepupuka belanja, tambah mega nitihka Atur Mindah Betagang Belebas (PKPB) enggau Atur Standard Pengawa (SOP).

“Tang puji Tuhan, pejalai udah mujur, bantu udah datai ba orang dituju lalu bala kitai udah ngabas enggau nanyaka berita sida serumah, chukup sinu lebuh ninga rita dikunsi bala ke kin,” ku Insol.

Berita penuh Ruai 7 pagila.

Suara Sarawak