ARTIKEL

DeAngelz mai Fely angkat nyadi pedagang nyulut 

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

‘UKAI senang deka nyadi senang, ukai tusah deka nyadi tusah’.

Nya rambai jaku ti seruran digenggam Felicia Juban ti rindu agi dikelala ngena nama Fely nyentuk sehari tu.

Peneleba idup ti chukup pait nyadi peransang dikena iya ngangkatka diri pengudah labuh teterap tetingkap.

Pengeransing, pengepuh enggau pengeliat ati deka ngemansang sereta ngangkatka tikas pengidup diri mujur nempa Fely nyadi siku pedagang nyulut.

Pengudah tetemuka ruang bilik DeAngelz, dia deh pengidup Fely berubah seratus peratus ari siku orang ti enda landik ba pengawa dagang nyadi siku pedagang nyulut sereta nyadi chunto ngagai orang bukai.

Iya berengkah tekait ati enggau produk DeAngelz kelebih agi Kopi Dara Lawwa (KDL) lebuh suman ari penyakit datai kain ti enda stabil pengudah ngirup kopi nya.

KALA DIKEENGAI ENGGAU DIBUAI

Taja pen tuchum manis enggau ketawa seruran ngias mua Fely tang nadai siku nemu ba belakang semua nya ngundan seribu satu pengingat pait.

Begulai lantang enggau orang dikesayau ngemudika ruang bilik diri nyentuk ke lesi endang pekara ti seruran disampi, dipinta enggau diajih genap orang. 

Keterubah nirika ruang bilik suba, Fely andal ngumbai ruang bilik diri ulih beretan nyentuk nyawa lesi dudi hari tang enda nyangka semua nya puntan ba tengah jalai.

“Andal meh aku ngumbai mata panas manchar tampak bebendang nyentuk ke lemai.

“Seinchi nadai meh aku nyangka ujan ti disempulang kudi biau balai datai ngenyit mangka maya tengah hari.

“Baka teritik ai ujan bangat meh aku nyabak beterenjui ngenang nasip diri. 

“Nadai aku ngadang penyayau nuan bebali nyadi pemenchi,” ku Fely seraya sinu mulaika kenang diri.

Fely nadai ngadang pengerindu tuchi ditanggam ngelama tu betukar nyadi benchi nyentuk iya kala dikeenggai sereta dibuai orang pemadu dikesayau.

“Semina Tuhan aja nemu pengeruntuh asai ati aku maya tu suba. Nyentuk diatu, aku agi tekenyit enda ngadang pekara tu tau nyadi.

“Anchur. Telih. Sinu. Tekenyit. Nadai daya. Putus pengarap. Kusut runding. Tu meh pekara ti diasaika aku maya tu suba. 

“Semina anak meh nyadi tungkat pengering dikena aku bepaut ngangkatka diri taja chukup pedis napi semua tu. 

“Anak meh ngasuh aku kering nyentuk diatu,” tusui Fely.

ANGKAT PENGUDAH LABUH

Lebuh tekenang ke nasip anak nadai apai, nadai orang nupi baka anak bukai, dia deh indai tunggal anak dua nya ransing sereta mutus ati ngaul dagang online.

Taun 2015 nyentuk 2016 endang taun dikena iya ngangkat enggau ngemansangka diri pengudah napi penguji besai nya.

Laban ti ngembuan pengerindu ba pengawa pemajik gamal enggau pengerai, dia deh iya berengkah nyual bemacham produk nya nengah online.

Kelimpah ari nya, Fely bela nyual bemacham pekayan enggau produk bukai dikena ngiga anak belanja nupi anak diri enggai ke ngining anak orang bukai.

“Keterubah suba, aku sigi nadai penemu enggau pengelandik dikena bejalaika pengawa dagang online lalu tu meh keterubah aku mekuh pengawa tu. 

“Penemu aku ba pengawa dagang online endang kusung laban aku ukai datai ari ruang bilik bedagang.

“Ketegal nadai penemu enggau pengelandik dikena bejalaika dagang online ngujung ke aku enda ulih beretan lama ba pengawa tu.

“Pekara tu ngasuh aku putus pengarap, sinu sereta tusut runding ngenang nasip diri enggau pengidup anak dudi hari.

“Nyangka udah selatan diatur Tuhan, ba bulan Oktober ba taun 2019, tu meh keterubah aku tetemu enggau ngelala produk DeAngelz,” ku iya.

PRODUK BEKUALITI

Semua nya bepun ari penanggul pengerai orang indu ti ditapi iya pengudah beranakka anak kedua iya.

Maya nya suba, Fely napi penanggul datai kain ti enda stabil lalu berengkah ngambi bemacham ubat, vitamin enggau beperesa ba klinik dikena nyumanka penyakit nya tang lalu nadai bisi insur. 

Bisi sekali, iya bisi ninga senentang produk KDL lalu mayuh orang bekunsika pemanah enggau peneleba diri pengudah ngirup KDL.

Berengkah ari nya, Fely lalu nyerungkai senentang produk KDL nyentuk iya tetemuka lumur telefon Pemungkal Produk DeAngelz, Angela Ann Awal ti bisi diengkah ba bungkus produk nya.

Iya madah, meda mayuh orang meri timbal manah ngagai produk KDL kelebih agi raban indu ti napi penanggul sebaka, dia deh iya mutus ati nguji ngirup KDL.

“Aku pen nyerita penanggul diri ngagai Ann lalu iya ngasuh aku ngirup KDL kelimpah bekunsika pemanah produk tu.

“Pengudah berapa hari ngirup KDL, penanggul datai kain ditapi aku pen bisi berinsur manah.

“Kira seminggu udah nya, penanggul tu gerai penuh lalu timpuh datai kain aku pen lanchar baka selama.

“Sebedau tu aku semina macha enggau mendingka testimoni ti dikunsi orang bukai tang sekali tu pekara tu amat nyadi ba aku empu.

“Tu meh ngasuh aku chukup andal produk DeAngelz kelebih agi KDL endang ngasi sereta bekualiti.

“Ukai semina ngelanchar datai kain aja tang ulih mantu aku ngurangka pemerat tubuh lalu maya ngadaka anak ketiga pen aku bepantang ngena KDL laban tu manah ungkup indai udah beranak,” tusui iya.

Ungkup penerang, diatu Fely udah belaki baru lalu mujur ngadaka anak ketiga iya sereta idup lantang begulai enggau orang baru.

NGERANDANG DAGANG

Ukai naka nya aja, Ann bela nerang ngagai iya peluang dagang ti bisi disediaka DeAngelz dikena mantu raban indu nyungkak penatai pemisi diri empu enggau diri sebilik.

Laban kala ngasaika pengasi produk KDL sereta minat ti besai ba pengawa dagang sebedau tu, dia deh Fely nguji ngaul diri ba pengawa dagang DeAngelz.

Iya madahka diri berasai temegah meda pengeransing Ann deka mantu mensia mayuh kelebih agi raban indu ngemansangka diri ba pengawa dagang.

“Sekumbang ngaul dagang DeAngelz tu, raban kami seruran diajar, diembing, diberi latih, disikap sereta diperansang ngena bemacham penemu, pengelandik enggau strategik bedagang.

“Kami bela meransang, ngajar enggau ngembing pangan diri lalu kaul kami pen nyau baka diri menyadi.

“Tu meh ngasuh aku majak ransing bejalaika pengawa dagang tu lalu naka ulih mai mayuh raban indu angkat bedagang.

“Enti suba, penemu aku ba pengawa dagang online tu agi pabu lalu tau dikumbai kusung tang ketegal berekat ajar, embing enggau peransang ari ruang bilik DeAngelz, aku pen majak ngelala dunya dagang online,” ku iya.

NEMPA MAYUH PENYULUT

Sekumbang ngaul dagang DeAngelz, indai ti datai ari Pelilih Batu Niah nya nyadi siku pedagang nyulut.

Genap bulan asil dagang iya majak nambah sereta suah nyapai tagit RM10,000 sebulan nyentuk iya diangkat nyadi chunto ngagai orang ti bukai.

Berekat pengeransing enggau pengepuh iya bejalaika pengawa dagang nya, iya mujur nyimpan duit saham ungkup anak iya enggau diri empu kelimpah nyungkak penatai pemisi tambah ngagai ruang bilik diri.

Ukai nya aja, ulah enggau idup iya pen majak berubah lalu jauh bebida enti dibanding ulah iya ti suba.

Suba iya siku orang ti jampat angat sereta suah sebana ba sebelah media rama tang diatu iya nyau majak profesional, tuai runding, pintar bedagang enggau mutar penanggul diri kelimpah pintar ngena peluang.

“Aku chukup beterima kasih ngagai Tuhan laban mujur ngelala produk enggau tim DeAngelz lalu sida meh mayuh mantu aku angkat baru pengudah labuh.

“Bemacham pengasai ti diasaika aku diatu. Bisi nya gaga, lantang sereta nyabak gaga laban nadai ngadang diri tetemuka ruang bilik DeAngelz ti chukup mayuh mantu aku ngelama tu.

“Sida meh ti ngajar aku senentang atur bejalaika dagang online from zero to hero,” ku iya.

TIBAR PERANSANG

Anak lumur empat ari tujuh diri menyadi nya, meransang mensia mayuh kelebih agi raban indu enggau indai tunggal ngambi seruran ngemerat pengerai diri enggau diri sebilik.

Iya madah, raban Opis Pengerai suah ngelalau kitai ngambi seruran ngemerat pengerai tubuh diri nyentuk sida suah mantaika rambai jaku ‘pengawa nagang manah agi ari ngubat’.

Nya alai, ku iya, enti kita bedau nguji produk DeAngelz kelebih agi KDL, kita patut berengkah bepakaika produk nya laban nya endang bekualiti sereta manah ke pengerai tubuh.

“Aku madah munyi tu ukai deka ngelakuka produk tu tang bekunsika peneleba ti kala diasaika aku empu.

“Semina kitai indu aja nemu pemedis napi penanggul datai kain ti enda stabil tu, chukup enda nyamai.

“Tang aku betuah laban tetemuka KDL tu lalu tu chukup ngasi mantu aku mutar penanggul tu.

“Nya alai, aku meransang semua orang enda ngira penempa nguji produk tu laban endang manah ke pengerai tubuh,” tusui iya.

Tangkan iya, sayau ke diri empu dulu sebedau sayau ke orang bukai laban pengerai nya reta berega dikembuan genap kitai.

“Bajik tauka sigat baka ni pen kitai tang enti tubuh kitai enda bepengerai, tu nadai guna. Nya alai, kemerat meh pengerai diri ngena produk DeAngelz,” tandu iya.

Fely mega meransang raban indu kelebih agi indai tunggal ngambi ngaul pengawa dagang online.

Iya madah, pemansang teknologi kemaya hari tu majak maju lalu semua utai semina bepanggai ba tunjuk jari aja.

Ku iya, kitai patut ngena peluang nya dikena nyungkak penatai pemisi diri enggau diri sebilik laban pengawa bedagang online nya muntang dikereja sereta ulih diatur ari rumah aja.

“DeAngelz tu meh nyadi pelasar manah dikena ngaul pengawa dagang online.

Ngena peluang berega tu, Fely meri besai terima kasih ngagai Pemungkal DeAngelz, Angela Ann Awal enggau tim DeAngelz ti bukai.

“Aku chukup benasip sereta betuah laban mujur ngelala bala kita ti chukup mayuh mantu aku ari sukut nyaga pengerai, pengawa dagang, jaku peransang, latih enggau ti bukai.

“Maya aku labuh teterap tetingkap, kita meh mantu ngangkatka aku lalu maya ari enda nemu senentang dagang online suba, kita meh ti enda leju ngajar aku nyentuk diatu.

“Kita semua chukup berega ba aku enda nyalah nyau baka menyadi diri. Nya alai, aku ngarap semua kitai terus maju nyingkang ke mua,” ku iya.

Iya mega beterima kasih ngagai sida sebilik, bala bakih, kaban belayan enggau bala penguna ti seruran nyukung dagang enggau produk DeAngelz.

Bepelasar ke peneleba idup ti kala diasai iya, Fely madah, enti kitai deka maju mansang ke mua, bisi tiga pekara patut dibuai ba pengidup kitai.

Nya nyengkaum orang ti deka ngelabuhka kitai, orang ti nyadi batu api sereta orang ti suah besadung penyai enggau pengelemi orang bukai.

“Enti kitai betemu enggau orang baka tu, kitai patut mendingka sida aja lalu anang terunda-runda nitihka sida begendangka penyai orang,” ku iya.

Mensia mayuh ti deka nemu silik bekaul produk DeAngelz enggau dagang online Fely nya diperansang ngelawa Facebook Fely Chia DeAngelz.

BEKUALITI… Produk KDL chukup ngasi sereta manah ke pengerai dalam tubuh orang indu.

Produk Kopi Dara Lawwa.
PUN PERANSANG… Anak meh nyadi peransang Fely angkat pengudah labuh.
ARAM ANGKAT… Fely bela meransang bala indu ngaul pengawa dagang online dikena ngangkatka tikas ekonomi sida.

BERITA LAIN

Nempa Sarawak nyadi tibang pemakai

TUSUN KETERUBAH MINAT Reynold anak Jacktola, 29, ti rindu agi dikangau Nol ba pengawa betanam betupi nya endang dikembuan iya ari mit laban iya datai

Tebing Sungai Saratok deka diseleti meruan

SARATOK: Perintah Sarawak deka nyeleti pengkalan ba seberai Pasar Saratok enggau jematan dikena ngelayang Sungai Paon. Kaban Kunsil Nengeri (ADUN) Kalaka, Mohamad Duri madah, sepenyampau

BERITA TERBARU

PUSTAKA agih daging korban kepada 220 asnaf

KUCHING: Perbadanan Kemajuan Perusahaan Kayu Sarawak (PUSAKA) memperluaskan rezeki dengan mengagihkan daging korban sempena Program Ibadah Korban PUSAKA 2024 kepada 220 orang asnaf bertempat di