Deirdre Kumang BDCF 2019

SIBU: Deirdre Serena Michael Remy menggi gelar Kumang Pengerami Main Asal Dayak Borneo (BDCF) 2019 beserimbai enggau batang pengerami Panggau BDCF di Laman Tun Tuanku Bujang, malam kemari.

Dara bajik beumur 22 taun tu asal ari Kanowit mujur mai pulai mata duit RM2,500, jumpang, selampai, trofi, hamper enggau bungai.

Nangkan nya ba penuduk kedua dipenggi Valerie Michell Alli, 20 taun, bela datai ari Kapit nerima RM1,500, selampai, trofi enggau hamper.

Penuduk ketiga pulai ngagai pemekit ari Sibu, Stephany Maszleen, 22 taun, nerima RM1,000, selampai, trofi enggau hamper.

Frederica John, 24 taun, enggau Norani Roseline, 21 taun ba penuduk keempat enggau kelima nerima RM450 enggau RM350 sereta selambar selampai siku.

Tujuh pemekit bukai Liana Ngelai, Erin Rubieny, Elvyna Edwin, Oliviana Ana, Kamelia Masam, Liana Joseph enggau Cynthia Sumang mega nerima perais sagu ati.

Menteri Muda ba Opis Kepala Menteri (Undang-undang enggau Adat Bumiputera) Datuk John Sikie Tayai udah dipebasa nyuaka perais tu ngagai bala pemenang.

Sama datai Kaban Kaunsil Nengeri (Adun) Tamin Christopher Gira Sambang enggau Chairman Komiti BDCF 2019 Donna Petrus Ngelai disempulang bala bukai.

KUMANG BDCF 2019… Deirdre (duduk) diapit Valerie (kanan) enggau Stephany (kiba).

Suara Sarawak