Deriba ba jalai alun, anang ngira diri aja

PUSA: Penguna jalai alun bela ditangkan patut nyaga ulah diri maya deriba sereta perundingka pengelikun diri enggau orang bukai maya deriba.

Kaban Kunsil Nengeri (Adun) Lingga, Simoi Peri madah pengelikun ba jalai alun patut dikemerat sereta dikembuan semua penguna jalai alun kelebih agi maya deriba enda milih nguna perengka pengangkut besai tauka mit.

“Pagi tadi (kemari) aku empu kena tuntung penusah bebadi maya ba rantau jalai nurun ke Pusa ketegal ulah deriba bukai ti enda bejimat sereta enda ngira pengelikun diri enggau orang bukai.”

“Ba penusah nya, kerita kami bela nuju pangan diri laban enda sempat nekan brek, kerita aku balat keremping ba belakang laban kena lantak kerita bukai ke entudi.”

“Taj pia, Puji Tuhan kami nadai bakal ketegal penusah nya,”ku iya nusui penusah enda disadang nya nyerumba pengerami Rindok Digital ke diatur ba Dataran Tandang Sari ditu, pagi kemari.

Nambah nya ku iya,minta semua deriba perengka pengangkut jalai alun bela bebasa ke pangan diri.

“Titih undang-undang ti udah ditetapka maya deriba, enti deka ngetu beri dulu lampu signal awakka orang ti entudi kitai nyamai ngadang,”

“Bisi ensiban mimit meda ulah sekeda penguna ti deriba enda beradat. Ulah baka tu mih ti suha ngujungka penusah bebadi ba jalai alun.

“Nya alai, bejimat mih maya deriba buai ulah ti ‘lelawa’ maya deriba laban jalai alun ukai alai kitai mantaika diri baka ‘jaguh’ tambah mega diatu jalai bedau menyana ketegal projek Pan Borneo ti benung dipejalai,” ku iya.

Dulu ari nya, kerita ke ditepan Simoi bebadi ba siti selikuh enda jauh ari simpang Pusa semak menua Rapong, Debak lebuh sebuah kerita proton ngetu ngenyit, nadai meri signal dipelaba ketegal deka nyeliah sebuah kerita hilux ti sama bela deka ngelih ari belakang.

Suara Sarawak