KUALA LUMPUR: Inisiatif Perintah Penyerakup negapka teknologi digital dalam sektor betanam betupi nengah program pemungkal eLadang tauka dikumbai Digital Agriculture Technology (Digital AgTech) matak perati Kesatuan Eropah (EU)-ASEAN Business Council.
Pekara nya dipadah Menteri Komunikasyen enggau Digital, Fahmi Fadzil ba ruai Facebook iya pengudah nerima penemuai basa ari deligit EU-ASEAN Business Council diuluka Direktor Eksekutif iya, Chris Humphrey.
Inisiatif Digital AgTech dikemansang Kaunsil Pemansang Ekonomi Digital Malaysia (MDEC) enggau tuju negapka orang bumai sereta dagang tani ba selampur menua ngena teknologi moden pasal produktiviti sereta timpuh panjai ke deka mutarka isu pengelikun pemakai menua.
Pekara tu mega disikap bemacham penteba mungkur pengawa betanam betupi enggau matau tikas utai tanam, gaya hari, pekara makit, ngemansang pemansut enggau pemanah ladang.
Fahmi madah, sida enggau Humprey mega berandau pasal polisi ngeranchak ekonomi digital, transfomasyen digital Malaysia enggau pemansang pemadu baru infrastruktur 5G.
“Ba ujung randau, kami bisi bejaku pasal pangku pengawa perintah enggau serikat peribit munaska penyalah siber,” ku Fahmi.
Iya mega andalka randau nya ulih ngerapitka agi kaul dua raban entara Opis Menteri Komunikasyen enggau Digital sereta EU-ASEAN Business Council kelebih agi ba sektor digital. — BERNAMA
