Digital Ekonomi majak dikemansang

KUCHING: Perintah Nengeri majakka pengawa pemansang ekonomi digital di Sarawak.

Ku Tuai Pemegai Menua (TYT) Tun Abdul Taib Mahmud, bemacham inisiatif udah dipejalai dikena nyapai tuju enggau juluk nya.

Inisiatif tu nyengkaum pengawa numbuhka Kaunsil Multimedia Sarawak (SMA), ngelancharka Strategi Ekonomi Digital Sarawak 2018-2022, Hab Inovasyen, Sarawak Pay, Desa Digital Village enggau kerejasama latih pengereja landik baka Centexs enggau Huawei.

Ku iya, inisiatif tu deka nyendiaka pelasar tegap dikena Nengeri tu ngemujurka pejalai ekonomi digital baka ke udah diperambu.

Iya mansutka jaku nya beserimbai enggau pengawa bejadika Pengawa Beradat Aum Keterubah Penggal Keempat Aum Kunsil Nengeri (Dun) Sarawak Ke-18 di Dun ditu tadi.

GAWAKA RAYAT… Penatai TYT Sarawak Tun Pehin Sri Abdul Taib Mahmud diambat Kepala Menteri Datuk Patinggi Abang Johari Tun Openg sereta Adun bukai lebuh datai ngulu pengawa bejadika Pengawa Beradat Aum Keterubah Penggal Keempat Aum Kunsil Nengeri (Dun) Sarawak Ke-18 di Dun ditu tadi.

Pengawa bekenaka aplikasyen teknologi digital ba mayuh bengkah sektor ekonomi kelebih agi dagang temuai, pengawa industri, betanam betupi enggau ngemansangka mengeri pintar mega nentuka Sarawak ulih besemekih ba renggat dunya, ku iya nambah.

“Pengawa tu mega deka ngerembaika makit produk kitai ngagai renggat dagang entarabansa.

“Nya kebuah pengawa ngemansangka infrastruktur pemun ba pekara teknologi digital endang patut chakah agi dipejalai.

“Tu nyengkaum pengawa nirika mayuh agi tiang pemanchar telekomunikasyen, ngena sambung fibre optic enggau internet ti deras agi,” ku iya nyimpul.

Suara Sarawak