PEJALAI nemuai ngelantangka ati diligit Perintah Perak ke Kampung Budaya Sarawak empai lama ninggalka seribu kenang manis ngagai raban nya.
Palan dagang temuai budaya nya temegah enggau lantang ati nerima penatai diligit nya begulai enggau raban Opis Menteri Dagang Antarabansa, Industri enggau Meranak Puku (MINTRED).
Raban nya mega disempulang bala pengari ari Kaunsil Pemansang Ekonomi Sarawak (SEDC) ke udah ngatur penemuai kena 28 September tu tadi.
Penemuai bala sida dipun enggau serumpu merarau di Restoran Budaya, sebedau diligit nya nampung pejalai nyerungkai penyelai budaya enggau pesaka dikembuan rayat Sarawak.
Entara peneleba enggau kenang berega sekumbang nemuai kia baka nguji niti Andau Buluh ti nguji pengerawan ati seraya bayam pemanah rampa menua dia.
Penatai sida dilalu enggau tanda asal raban bansa Bidayuh di Rumah Baruk Bidayuh sereta Ajat Ngelalu Temuai ari raban bansa Iban ba Rumah Panjai Iban.
Utai ke ngasuh ati gagil lebih sida diberi peluang begambar ungkup kenang sereta nguji aktiviti asal baka diajar chara ngesuhka laja ngеna sumpit ba Rumah Penan.
Pejalai sida ditampung ngagai Rumah Panjai Orang Ulu, ngelawa enggau meda pengawa ba Langkau Ngambuh Duku sereta dibai niki ke Rumah Tinggi Melanau, Rumah Melayu enggau Rumah China.
Bala sida mega bisi dibai limpаng napatka Kedai Nyua Tepa Kampung Budaya Sarawak ungkup bebelika tepa ngambi bisi dibai pulai ke menua ungkup kenang udah nemuai kia.
Raban Kampung Budaya Sarawak ngarapka penemuai nya meri peneleba berega, pejalai ti besai reti enggau kenang manis ngagai semua sida.
Penemuai nya mega meri awak ngagai sida meretika agi pengelain budaya enggau pesaka ti bisi di Tanah Kenyalang lalu ulih mai cherita nya ngagai sida di Tanah Semenanjung.
Ngena peluang tu, terima kasih besai ke penatai bala kita a Sarawak lalu betemu baru di Kampung Budaya Sarawak jemah!
