Dingaka tebah Ayun Lundai ari KeMADA ba Youtube

SIBU: Kelab Main Asal Dayak Sibu (KeMADA) ditu deka ngeluarka siti video mantaika main asal.

Nitihka penerang dibantai nengah laman Facebook sida, video pasal tebah digela Ayun Lundai nya deka dikeluar nengah channel Youtube sida.

“Baka udah disemayaka sehari dua tu, kami deka ngeluarka siti video mantaika main asal kitai Iban, bêtebahka kereban tebah lama ke alai tebah tu digela Ayun Lundai.

“Video tu kena kami meri tabi basa enggau terima kasih ke sukung semua kelebih agi bala ti chukup rindu enggau angkunka main asal kitai Dayak Iban,” ku penerang nya.

Berindik ari nya, bala kaban kelab meransang mensia mayuh Like, View, Share, enggau Subcribe video https://youtu.be/Q9XAiQvt5Dc kelai sukung ngagai pengawa ngangkatka main asal nya.

Sida mega ngarapka semua bala ti rinduka main asal kitai Iban deka teperindang lebuh meda enggau ninga tebah dalam video nya ila.

“Enti kitai bisi pengangkun ba main asal kitai, pandangka sukung kita ngagai inisiatif bala kami tu ngena chara like, view, share enggau subscribe video.

“Terima kasih besai ke sukung ari kita semua ngelama tu dataika bala kami majak ransing ati ngangkatka main asal enggau adat Dayak,” tandu penerang nya.

Berita penuh Ruai 8 pagila

Suara Sarawak