ARTIKEL

SINGKANG BESAI… Pengawa nyerahka dokumen kuasa ngagai Direktor JPNS, Datuk Dr Azhar Ahmad ari Tuai Sekretari KPM, Datuk Indera Nik Nasarudin Mohd Zawawi, seraya Fadhlina Sidek, Roland Sagah, enggau Anuar Rapaee ngemata.

Direktor JPNS diatu bisi kuasa ngemendar projek

Facebook
Twitter
LinkedIn
WhatsApp
Telegram

KUCHING: Opis Menteri Pelajar Malaysia (KPM) nyerahka kuasa ngagai Direktor Opis Pelajar Nengeri Sarawak (JPNS) ngambi ngemendarka projek ti dipelanja Perintah Sarawak.

JPNS ba sebengkah penerang berita sehari tu madah, kebuah pia laban ngelama tu kuasa ngemendar projek bepanggai ba KPM di Putrajaya taja dipelanja Perintah Sarawak.

Ku penerang nya, pekara nya udah ngasuh pengawa meri pemendar enggau bejalaika projek nyau laun.

“Projek di baruh Program Transformasyen Menua Pesisir (RTP) enggau Projek Mit Pemansang Menua Pesisir (MRP) sereta projek mit ke bukai ti dikemendarka pengari rayat menua tauka Kaban Kunsil Nengeri (ADUN) tu udah ditangguh.

“Pekara baka tu ngasuh orang asa ukai semina bala pengari rayat aja tang mega sida ti nerima projek baka nembiak, apai indai enggau pengajar.

“ADUN tampak rita laban meri bantu ngena agih belanja RTP enggau MRP ninting taun ngagai sekula enggau palan pelajar bukai, lalu ari kuasa diserah tu, penanggul projek laun dikemendar ulih teputar,” ku iya.

Kelimpah ari nya, kuasa mega diberi ngagai Direktor ungkup projek bukai ti ukai dipelanja Perintah Sarawak.

Taja pia, pekara nya meseti dulu agi dipesetuju Opis Menteri Pelajar, Inovasyen enggau Pemansang Penau (MEITD).

Inisiatif tu dipeda nyadi singkang besai ngagai KPM asil ari sekeda randau entara MEITD enggau KPM pasal subjek Sempekat Malaysia (MA63) kelebih agi Perenggan 17 Laporan IGC 1962.

Berebak enggau nya, MEITD udah merambu sekeda pekara di baruh Perenggan 17 Laporan IGC, lalu udah nyapai pemujur sereta pekara bukai ti begunaka randau silik agi ukai semina enggau KPM aja, tang mega raban Bersekutu Persekutuan ke bukai.

Seraya Komiti Pengatur Begulai deka berandauka pekara di baruh MA63 kelebih agi Perenggan 17 Laporan IGC 1962 enggau pekara sereta isu bukai pasal pelajar di Sarawak.

Pengawa nyerahka kuasa nya udah dikemataka Menteri Pelajar Fadhlina Sidek, Menteri Pelajar, Inovasyen enggau Pemansang Penau, Datuk Sri Roland Sagah Wee Inn, enggau Sapit Menteri Pelajar enggau Inovasyen, Datuk Dr Anuar Rapaee.

BERITA LAIN

Rampa menua meruan beresi

Aum Parti-Parti (COP) Konvensyen Langkar Pengawa Ubah Klimet Gerempung Bansa Beserakup (UNFCC) ngempuru bemacham raban pemegai taruh antarabansa ari dunya dagang, perintah enggau komuniti sivil.

BERITA TERBARU

Rampa menua meruan beresi

Aum Parti-Parti (COP) Konvensyen Langkar Pengawa Ubah Klimet Gerempung Bansa Beserakup (UNFCC) ngempuru bemacham raban pemegai taruh antarabansa ari dunya dagang, perintah enggau komuniti sivil.