Ditipu bepuluh ribu meli sengkabung mua online

SIBU: Berasai jera meli sengkabung mua chara online pengudah kena tipu lebih RM93,000 enggau RM3,000.

Pengerugi tu nuntung dua iku indu nyengkaum siku pengajar ke rugi lebih RM93,000 pengudah iya meli sengkabung mua ari siku indu nengah chara online.

Tudah pengajar nya madah diri bisi ngudar 200 kutak sengkabung mua berega RM50,000 ari saspek nengah aplikasi Facebook Messenger kena 29 Julai tu tadi.

Ketuai Polis Pelilih Sibu ACP Stanley Jonathan Ringgit nengah sebengkah penerang madah, pengajar nya ngaga bayar berenggat ari akaun Maybank enggau Ambank ngagai akaun Maybank nengah chara online bisi 13 kali transaksi bepun 29 Julai nyentuk 1 Ogos tu tadi.

“Iya terus nitihka peminta saspek mayar utai bukai nyengkaum ungkus chukai penyampau RM17,360 kena 2 Ogos lalu udah nya mayar RM8,560 ungkup ungkus pos kena 3 Ogos.

“Kena 4 Ogos, pengajar nya dipinta mayar chukai bukai enggau penyampau RM17,800 mega dipindah ngagai akaun saspek ke sebaka,” ku iya.

Tandu iya, tudah pengajar nya dipinta mayar tambah RM2,500 tang iya enggai agi mayar nyampau nya.

Ku iya, saspek udah nya madah barang ke diudar deka datai ba rumah kena 6 Ogos tang barang nya lalu nadai datai baka ke disemaya.

“Tudah pengajar tadi berengkah enda nyamai ati lalu berasai kena tipu lebuh lumur telefon enggau jaku pesan pandak disekat saspek,” ku iya.

Stanley madah, pengajar nya ngaga ripot kemari pengudah iya rugi manggai RM93,070.

Berebak enggau nya, ba sebengkah agi kes nyadi ba endur bukai, siku pedagang indu beumur 45 taun mega napi nasip ke sebaka pengudah iya ngudar 10 kotak sengkabung mua ke ngundan 2,000 limpir sengkabung mua ngena chara online kena 6 Ogos tu tadi.

“Tudah ti kena tipu tu diasuh mayar RM300 ungkup genap kutak nya ti ngujungka iya rugi manggai RM3,000 pengudah ngaga bayar penuh,” ku iya.

Saspek besemaya deka nganjung sengkabung mua ngena servis kurier tang pengudah lumur ‘tracking’ diperesa nya ukai nama pemesan kena 7 Ogos tu tadi.

Udah nya, indu tu nemu diri kena tipu laban saspek nyau enda ulih ditelefon.

Ku iya, dua iku saspek mujur nipu ngasuh nepu wang ngagai akaun saspek tang kebendar barang ke dipesan sigi nadai.

“Kededua kes dipansik nitihka Seksyen 420 Kanun keseksaan laban penyalah nipu,” ku iya.

Suara Sarawak