Dolly minta saup raban NGO Dayak mutarka penusah sida sebilik

JULAU: Dolly Mangga, 53 taun, ari Rumah Robert, Nanga Beduie, Sungai Merurun ditu benung betapi enggau penanggul ngiga palan endur numbakka niang laki iya ke udah bebadi nyawa di Sepital Sibu ketegal penyakit Covid-19.

Nitihka penerang niang laki iya dikenuku nadai kena 20 Februari tu tadi, udah nya sida betapi enggau penanggul ngiga palan endur numbakka bangkai niang ba palan ke besemak di mengeri ketegal beguna belanja ke besai.

Berebak enggau nya, sida ke dituntung penusah tu tadi bisi berunding deka mai bangkai niang tu ke menua tang diperita enda diterima sida semenua laban nangika kena rampit penyakit tu.

Nya alai, Dolly minta saup raban bekaul lebih agi gerempung ukai perintah (NGO) Dayak mutarka penanggul ke benung ditapi iya enggau lengkas.

“Naka tu, nadai mayuh pilih semina ngandalka dua iti pendam aja ba mengeri Sibu ditu ulih nyaup ngatur penusah rabat baka tu tang nya begunaka belanja ke besai,”ku iya nusui sebana ngagai Suara Sarawak, tadi.

Kenu ku Dolly, diatu sida sebilik begunaka belanja chukut berat sereta besai nyema nguburka niang laki iya ba entara dua bengkah pendam pribit di mengeri. Nya alai, kami ngarapka bisi pendam bukai ke engkeman ungkup penusah ke bansa tu.