Dr. Neilson ngemegahka anak Dayak

SIBU: Raban Serakup Seni enggau Main Asal Tajai Sarawak tauka Serakup Tajai Sarawak meri tabi puji ngagai siku ari penyanding penemu serakup sida, Profesor Madya Dr. Neilson Ilan Mersat.

Presiden iya, Themotty Jagak ngarika bala bukai mantaika pengaga ati ngagai siku orang ke chukup dipebasa ti udah nerima Darjah Yang Amat Mulia Bintang Sarawak, Pegawai Bintang Sarawak (P.B.S) ari Tuai Pemegai Menua (TYT), Tun Pehin Sri Abdul Taib Mahmud di Dewan Besar, Astana Negeri, Petra Jaya, ditu kemari.

“Kami temegah ati meda pemujur enggau penyulut siku ari anak Dayak Iban ti udah nerima tanda basa ari TYT lalu tu tau nyadi peransang ngagai bala menyadi bukai.

“Aku empu chukup gaga nerima berita tu laban ngasaika Dr. Neilson tu endang patut nerima tanda basa ari pemanah pengawa enggau pengeransing iya nyaguka adat enggau main asal bansa Dayak ngelama tu,” ku iya lebuh dirandau Suara Sarawak.

Themotty madah, jasa Dr. Neilson chukup besai ba pengengkah enggau pengangkat serakup sida nipakka rambai jaku Nyaguka Adat enggau Asal Iban.

“Ambika semua nemu, nama Tajai nya empu ditibak ari penemu Dr. Neilson ti mai reti chukup besai ngagai tuju enggau kuing pejalai serakup kami.

“Kelimpah ari nya, menyadi kitai tu mega siku ari kaban chukup regas enggau sikar ngereja pengawa, nadai kala rangka penemu enti ditanya.

“Tu nyengkaum pemujur bala kami ngatur pejalai nanam pentik ba Tembawai Tampun Juah, Segumon, Kabupaten Sanggau di Kalimantan suba.

“Ari penau enggau penemu dikembuan empat iku penyanding penemu dalam serakup tu, kami sebuat andal amat ulih nyerakupka Dayak di Kalimantang enggau tanah Kenyalang tu,” ku iya madah nyemetak.

Berita penuh Ruai 5 pagila.

Suara Sarawak