MIRI: Perintah Sarawak setuju meri dron enggau entukar ngagai ejensi pengelikun dikena matau pemindah komuniti ngambika ngasi agi dalam nagang pengerekai Covid-19 di Miri.
Kepala Menteri Datuk Patinggi Abang Johari Tun Openg madah, pengawa meri keresa nya dikena ngemuntangka raban pengelikun jampat agi nemu pasal penanggul bekaul Covid-19.
“Raban pengelikun minta kitai mantu ari sukut nambahka keresa lalu Perintah Sarawak setuju meri aset baka dron sereta entukar dikena ngemuntangka sida lengkas agi nemu pasal penanggul ketegal pengerekai Covid-19,” ku iya.
Iya madah munyi nya ba aum pemberita pengudah mendingka Taklimat Penyangga Penusah Bagi Menua Miri bekaul enggau pengerekai Covid-19 ditu ensana.
Kenu ku Abang Johari, maya tu penyampau raban penerit adat baka polis, soldadu, Rela sereta ejensi bukai deka ditambah dikena nentuka Atur Pengawa Standard (SOP) Covid-19 dititih.
Nerang silik pasal peniki kes Covid-19 ba raban komuniti di Pelilih Beluru, Abang Johari madah nya beduduk ari daya pengidup enggau adat ba rumah panjai.
“Kitai ukai deka ngachau adat ba rumah panjai, tang kitai deka mensia mayuh ke diau ba rumah panjai ngemeratka disiplin sereta bekerejasama enggau perintah ngelaban pengerekai pandemik Covid-19
“Nya alai, aku minta Tuai Rumah enggau Ketuai Raban Bansa bela nitihka SOP pengelama 14 hari dikena mantu raban perintah mutuska pengerekai Covid-19,” ku iya.
Nangkan nya, ku iya dikena mutuska rantai pandemik Covid-19, nya begunaka disiplin ke tinggi ba raban komuniti laban igi penyakit tu chukup balat nyadi dalam dalam komuniti.
“Kitai deka meri bantu ngagai sida nengah Opis Pengintu Pendiau Raban Bansa (JKM) lalu sebarang aja pekara ke diguna sida,” ku iya.
Abang Johari mega meri terima kasih ngagai Komiti Penyangga Penusah Nengeri Sarawak (JPBNS) enggau raban gawa diluan dalam ngelaban Covid-19 sekumbang Atur Mindah Betagang Belebas (PKPB).
“Aku meri terima kasih ngagai semua raban gawa diluan ke udah chakah bejalaika pengawa enggau manah nyengkaum ejensi bepekayan penulu sereta komuniti ke bekerejasama enggau raban JPBNS.
“Aku nesau rayat mayuh terus nyaga diri empu, seraya nganti penatai vaksin, kitai ngarapka dalam timpuh enam bulan tu, kitai ngarapka penyadi tu ulih suman,” ku iya.
Tandu iya, Perintah Sarawak deka meri vaksin secara pechuma ngagai semua rayat di nengeri tu dikena nurunka kes Covid-19 dalam komuniti.
Abang Johari mega bisi ngenataika replika chek ngagai Masjid Darul Ehsan penyampau RM756,620.
Sama bisi datai Sapit Kepala Menteri ke mega Chairman JPBNS, Datuk Amar Douglas Unggah Embas, Sekretari Perintah Nengeri, Datuk Amar Jaul Samion sereta bala menteri kabinet Sarawak.
