KUCHING: Majak tebilang sereta tampak eksklusif, kain Buri lama ngembuan kualiti ti berega sereta alus ari kain Buri moden.

Enti dipeda ari jauh, nyangka kitai enda tentu ngelala ni bagi kain Buri lama tauka kain Buri moden tang siti bida ti tampak dikelala mensia diatu iya nya kain Buri lama ngena leka marik Buri ti alus lalu kain Buri moden ngena leka marik Buri ti lebih besai.

Taja pia, kain Buri jam ke diatu nyau udah nyadi tren pisin mensia kemaya hari, laban genap kali bisi program tauka pengerami, raban orang indu sigi gagit deka mantaika kain Buri ti dikena sida.

Peluang nya enda dibasau siku pedagang Buri, Drothy James Chayak ari Kapit lebuh iya ngayanka pisin Buri ti bebida sereta nyelai.

Drothy ngena leka Buri lama ba asil kraf jari iya ti tebilang agi dikumbai Keranjai Mimie.

Baru udah dipadu nyadi champion ‘Langkar Pekayan Kontemporari’ rambau Program Ramah Tamah Uniti Keamatan enggau Gawai Renggat Nengeri Johor kena 10 June tu tadi.

Indu asal ari Jalai Selirik Kapit nya madah, chara iya nengkebang Buri chukup silik sereta nyelai ari orang bukai.

“Aku nyura Buri ngena motif ukir asal Iban lalu kain ti dikena aku ngelekatka Buri sigi ngena kain Buri asal kelia.

“Langkar Buri aku ngena pelasar kotemporari lalu aku chukup ngemeratka bansa kain ti patut dikena kelimpah gaya gaun ti meseti engkeman ngambi chura Buri aku tampak bebendang dipeda,” ku iya lebuh dirandau Suara Sarawak, kemari.

Pemungkal The Classy Mimie Studio nya madah, nadai kala belajar ngaga Buri ari orang bukai tang iya ngaku diri rindu meda kain Buri ti belikau sereta manah.

Pekara nya nyadi peransang ngagai Drothy nyentuk iya bulih penemu ngepunka dagang Buri nengah chap Keranjai Mimie.

“Meda orang ngaga kain Buri, aku pen lalu nunda tang aku nengkebang kediri milih bansa pisin kelebih agi pisin kotemporari nitihka pelasar ‘sedia ulih dikena’.

“Pelasar tu ti nyadi sejarah ngagai aku lebuh dipadu nyadi The Best Borneo Designer ba London kena taun 2019 suba,” ku iya ngenang baru sekeda penyulut ti kala dijapai sekumbang udah ngaul diri ba dunya dagang enggau pisin Buri.

Udah nya, Drothy deka mai nama Sarawak ngagai renggat antarabansa baru ba Malaysia Roadshow in United Kingdom 2023 kena 21 nyentuk 30 Oktober ti deka datai datai.

“Aku deka ngarika Sarawak mai produk Keranjai Mimie maya program tu ila.

“Maya program tu mega bisi diatur Pekit Miss Ambassador ke alai anak menyadi aku deka nyadi siku pesereta pekit ngayanka Keranjai Mimie rambau nya ila,” ku iya.

Taja napi pemar ari sukut awak ketegal ngembuan pengawa nyadi pengajar, Drothy naka ulih nembuka semua udar enggau peminta mensia mayuh ti rinduka kain Buri iya.

“Genap langkar enggau tengkebang Keranjai Mimie meri seput baru ngagai lanskap pisin di menua kitai kelebih agi ba Sarawak.

“Penyelai pisin ti digaga asil buah runding aku empu, nyadi kelai baru dalam dunya pisin kitai diatu kelebih agi dagang Buri.

“Aku mega kala nerima Anugerah Pedagang Nyulut Bagi Menua Kapit ba taun 2020 nengah dagang Buri tu,” ku iya.

Ngembuan pengarap ti besai ba pengawa ngerembaika dagang ba tikas ti tinggi agi Drothy keran deka ngelakuka kelai Sarawak nya ngagai serata dunya.

“Timbal mensia mayuh ngagai chap Keranjai Mimie balat meri peransang lalu majak diterima mensia mayuh berengkah ari gaun, seluar palazzo, skirt, baju, vest, baju kot lelaki, tali tie enggau ke bukai.

“Naka diatu, aku semina ngena pelasar digital ngelakuka produk laban ari media rama aku nerima peminta ti chukup manah,” ku iya.