KUCHING: Serakup Pemikir Dayak Sarawak (DTTAS) deka ngatur DTTAS Education Fair 2022 kena 6 Ogos tu ila ba Riveria Sport Centre, Debak pukul 8.30 pagi nyentuk pukul 3.30 lemai.
Sekretari Publisiti DTTAS Education Fair 2022 Malvina Albert Klinsing dalam siti penerang media madahka DTTAS Education Fair diatur awakka mantaika penerang enggau peluang ngagai nembiak ba menua pesisir ngulihka penerang pelajar, latih enggau pekara pelajar.
“Penerang pelajar ngagai nembiak ti udah tembu Setipikit Pelajar Malaysia (SPM) enggau Setipikit Tinggi Sekula Malaysia (STPM) ti enda mujur dalam bidang akademik bepeluang milih kus ti engkeman enggau setipikit sereta minat sida.
“Nya alai, sukung enggau embing amat beguna ngagai sida diatu, laban enti salah pilih, sida deka napi penanggul ba jeman ti deka datai,” ku iya.
Malvina madahka program baka nya diatur dikena sida ngembing nembiak awakka ulih ngaga pemutus ti manah enggau enda muai awak enggau belanja ti ulih ngujungka sida telepas peluang ngulihka pengawa ti manah pengudah tembu sekula.
“Ari program tu, kitai deka meda nembiak chakah nguna pelasar ti udah disediaka perintah awakka misyen enggau visyen DTTAS ngemansutka nembiak bepenau ba tikas maksimum ulih dijapai.
“Program tu bisi dipasuk Yahos School of Skills, Palan Latih Industri (ILP), Institut Pengelandik Nembiak Menua (IKBN), Palan Pemansang Pengelandik Sarawak (PPKS), Institut Pengelandik Mara (IKM), Unit Misi Akademik Universiti Teknologi Mara Sarawak (UiTM) enggau ejensi bukai,” ku iya.
Penerang silik pasal DTTAS Education Fair mensia mayuh tau betanya ngagai Isau Omar ba lumur 010 866 0965.
