DTTAS ngasai Pandelela endang patut diberi gela ‘Datuk’

KUCHING: Gerempung Pemikir Dayak Sarawak (DTTAS) nyukung penuh pematut meri pangkat ‘Datuk’ ngagai Pandelela Rinong laban ngasaika gela nya endang engkeman ungkup iya.

Penerang begulai Sekretari Besai enggau Penyanding Penemu Pekara Wang DTTAS Evelyn Julian enggau Nelly Tawai madahka Pandelela udah bulih midul emas ba ‘acara’ 10 meter papan indu Piala Dunya FINA 2021 lalu nyadi champion nya ke ngasuh nama Malaysia ditemu serata dunya.

“Pandelela ngumpul 355.70 mata ngulihka emas ngalahka penerejun menua nya empu Matsuri Arai ba penuduk lumur dua bulih 342 mata ke alai Caeli Mckay ari Kanada ba penuduk lumur tiga bulih 338.55 mata.

“Iya udah meri inspirasyen ngagai nembiak ngambika ngaul diri dalam lumba ti bepengerai nyeliahka ulah rama, nya alai nyadi siku ‘ikon’ iya endang patut dichiri nyadi ‘duta belia’ pasal pemadu guna lumba ngagai nembiak,” ku penerang nya.

Tandu penerang nya agi, ngulihka midul nya ukai pengawa ti muntang, tang Pandelela udah nunjukka iya ulih ngulihka midul numbur satu tu.

Evelyn Julian

“Kami berasai temegah enggau ngaku Pandelela ulih madah ngagai dunya sebuah menua mit ulih nyadi gerasi dalam lumba dunya.

“Pandelela ulih mantaika ngagai menua maju kitai ulih nyadi raban semekih ti besai dalam lumba terejun baka menua Amerika Syarikat, Australia, Kanada, Rusia enggau China ti endang ditemu ngembuan keresa ti chukup enggau raban pengajar ti betikas dunya,” ku sida.

Kelimpah ari nya, penerang nya madahka Pandelela mega udah bulih midul emas ba Lumba Komanwel 2010 di New Delhi, midul engkeraju ba Lumba Olimpik London ti ngujungka iya nyadi indu keterubah niki podium lumba Olimpik.

“Ba Olimpik Rio, iya enggau Cheong Jun Hoong udah teulihka midul pirak dalam ‘acara’ 10 meter.

“Iya udah ngaga pengabis manah dalam lumba akuatik enggau pengulih ti diulih iya endang patut diberi basa.

“Nicol Ann David, siku rayat Pulau Pinang pemain skuasy profesional nyadi pemain dalam ranking lumur satu dunya lebuh umur iya 23 taun mega nyadi indu Asia keterubah nyapai tikas nya,” ku seduai.

Nya alai penerang nya mega madahka kena 12 Julai 2008, Nicol Ann David bulih pangkat Pingat Darjah Setia Pangkuan Negeri (DSPN), mai gela Datuk beserimbai enggau Hari Pengada Gabenor Pulau Pinang, ngasuh iya nyadi orang pemadu biak bulih gela Datuk ba umur 25 taun.

“Nya alai, enda ibuh dipetalatka agi peminta rayat ti minta Pandelela nerima gela tu,” ku seduai.

Nelly Tawai

Suara Sarawak