Dua anak enggau uchu dikesayau lesi ba jalai alun

SIBU: Udah aruk dipukung enggau alung, udah labuh ditinggang lesung.

Baka nya mih nasip ditapi Salang Kaya, 76 taun, pengudah dua iku anak iru iya bebadi nyawa ketegal penusah bebadi ba jalai alun sebedau tu.

Diatu uchu diasika iya, Nicholester Dadup Unggat, 20 taun, lesi laban penusah ngenyit ke sama.

Ku Salang, berat asai iya napi penguji nya laban niang Nicholester Dadup ti endang ditupi sereta begulai enggau iya kenyau ari mit, pengudah apai indai niang sarak.

Ku iya, anak iru keterubah lesi dalam taun 1996 lalu anak iru kedua iya sepuluh taun udah nya, dalam taun 2016.

“Udah tembu latih dalam bulan Mei taun tu tadi, niang uchu asi (Nicholester) kami nya terus gawa ba Balai Polis Bandar Dato’ Onn di Johor.

“Taja jauh ari pangan diri tang kami suah betelefon lebuh bisi lepa laban ba aku empu, iya tu agi biak endar, umur baru manggai 20 taun.

“Sebedau penusah tu nyadi, kami mega bisi berandau enggau niang nengah kangau telefon.

“Iya madahka diri bisi operasyen ari pukul 12 tengah malam nyentuk ke pagi,” ku Salang lebuh dikerandau pemberita ba rumah iya di No 6G, Lorong 8, Sibu Jaya, lemai kemari.

Kelimpah ari nya, Ketuai Polis Pelilih Menua Sibu ACP Stanley Jonathan Ringgit bisi betemu enggau bala diri sebilik niang Nicholester, kena meri sukung moral ngagai sida.

Lebuh dirandau pemberita, Stanley madahka niang dipelabaka ditumbak ba pendam Nirvana, Sibu, pagi kena Hari Empat tu.

Berita penuh Ruai 2 pagila

Suara Sarawak