MIRI: Dua buah gerija ba sitak Kunsil Nengeri (Dun) Murun iya nya Gerija Roman Katolik (RC) St John enggau Gerija BEM Uma Balui Liko udah tembu dikemanah.
Kaban Kunsil Nengeri (Adun) Murum, Kennedy Chukpai Ugon madahka diri chukup lantang ati laban penembu dua buah gerija tu nengah agih belanja ari Projek Transformasyen Menua Pesisir (RTP) ungkup taun 2019.
“Puji Tuhan laban sehari tu tu kitai ulih meda dua buah gerija tu tembu dikemanahka taja bisi nempuh penguji ba timpuh Pendemik Covid-19.
“Lalu diatu kitai benung masuk ba renggat endamik lalu gerija tu udah tembu,” ku jaku Chukpai ba Program Bejadika Projek Ngemanahka Gerija nya, kilah ensanus.
“Pia mega meri tabi puji ngagai semua raban gerija RC enggau gerija BEM ti udah meri kerejasama ti chukup manah.
“Enda ditinggalka mega, Komiti Pemansang enggau Pengelikun Genturung Pendiau (JKKK) Uma Balui Liko ti betuaika Maren Umo Edok Maring ti udah ngemujurka program tu.
“Arapka enggau penembu dua buah gerija tu ulih meri pengelantang sereta pemaik ngagai bala ke besembiang ba palan tu,” ku Chukpai.
Sama bisi datai ba pengawa tu ensanus iya nya Pegawai Tadbir Menguasa Pelilih Menua Mit Sungai Asap Jackson Kong Chu Ing, Pemancha Tony Kulleh, Penghulu Simon Ambit, Pastor Jimbai Achol, Chairman BEM Pelilih Menua Belaga sereta bala ketuai kaum ari BRS Apau Koyan.
