Dua hari, tiga genturung karam di darat

KUCHING: Penusah karam di darat entara penusah ngenyit suah nuntung peranak menua tu.

Kandang dua hari tu aja, tiga penusah angus nuntung rumah panjai enggau rumah nyembuah.

Lemai 2 September tu tadi, peranak ari enam pintu bilik di Kampung Semop, Daro semina tinggal gari ba punggung aja pengudah rumah PPRT sida angus lengis diempa api.

Nitihka penerang ari Palan Operasyen Gerakan Bomba Sarawak, penusah nyadi urung pukul 3.20 lemai lalu sebuah agi rumah ba genturung pendiau nya nyauka angus lengis.

Taja pia, rumah diuan tujuh diri sebilik nya semina angus 10 peratus laban api mujur dipadam sida ke sama diau dia.

ANGUS LENGIS… Api mau nganguska rumah dataika tinggal tuga.

Peranak dia mega diripot madamka api ngena ai sungai ti dipam ari kapal ikan sereta sida ke tasah angus nadai apa nama.

Tang penusah angus tu enda naka nya aja ke alai urung pukul 7.30 lemai ba hari ke sama, sebuah rumah panjai di Stalon Belawai angus 100 peratus ngujungka 15 isi bilik lenyau reta tengkira.

Nitihka penerang, taja Rumah Noh Bin diuan 56 peranak nadai endur diau agi pengudah rumah panjai enggau keresa sida angus lengis dataika tuga tang mujur ngelarika diri.

Nambahka nya, genturung pendiau nya semina ulih dilawa ngena perau nengah sungai lalu pun kededua penusah nyadi agi dipansik. Takah sehari udah nya, Rumah Andrew Lawai, Jagoi Pakan angus 90 peratus malam ensanus.

Ripot madahka penusah nyadi urung pukul 8.45 malam ari sebuah bilik sebedau nyerarai ngagai bilik bukai.

Ku Ketuai Balai Bomba enggau Penyah Penusah Bintangor Nicholas Belulin, sida ngena inisiatif berangkutka ai ti diisi ke dalam perengka ngerara api penyauh 500 meter ari paip Bomba laban nadai pemansut ai ke semak enggau endur penusah nyadi.

Taja pia ku iya, nadai sebarang penusah bebadi nyawa enggau bakal nyadi lalu semua sida ditukuka likun.

Berindik ari penusah nya, pemerinsa lenyau keresa enggau rumah endur diau nerima perati ari bala pengari rayat sereta gerempung ukai dikuasa perintah (NGO).

Menteri Muda Pekara Korporat enggau Unit Komunikasyen Awam Abdullah Saidol sereta Kaban Parlimen Tanjung Manis Yusuf Abd Wahab mantaika penyinu enggau penyiru seduai ngagai semua isi bilik ba PPRT Kampung Semop ke dituntung penusah nya.

Kelimpah ari nya, seduai mega meri bantu ngambika ulih ngelempungka penusah ti ditapi sida.

Berebak enggau nya mega, 56 iku peranak Rumah Noh Bin Stalon Belawai bulih perati pengari rayat ba pelilih nya.

Adun Kuala Rajang Datuk Len Talif Salleh enggau Kaban Parlimen Tanjung Manis Yusuf Abd Wahab meri bantu ngenyit ngagai sida ba genturung nya.

Nitihka penerang ari Penolong Direktor Bagi Operasyen Bomba enggau Penyah Penusah JBPM Sarawak PgKB I Tiong Ling Hii madahka bisi 14 kes rumah panjai angus dirikod nyadi nyentuk 3 September tu.

Ku iya, tu nyengkaum 181 pintu bilik tauka 53 peratus ari 341 pintu ti dituntung penusah angus.

Ling Hii mega madahka lapan penusah angus ti nyadi ketegal ari pengawa nyumai lalu empat ari nya ketegal sut tali karan.

Naka diatu ku iya, siku indu nyelai pendiau (OKU) dirikod bebadi nyawa lalu empat diripot bakal ari semua kes angus ti udah nyadi.

Beduduk ari tiga penusah angus ti nyadi tu, mensia mayuh diau di kandang menua pesisir dilalau ngemeratka pekara pengelikun kelebih agi lebuh ngereja pengawa ti tau ngepunka sebarang penusah baka kelita, dian enggau ke bukai.

Nambah nya, genap rumah patut disikap enggau perengka guna pengerara api lalu diengkah semak enggau dapur tauka bilik tinduk sereta ruai.

Genap iku kitai patut beratka pengawa nyaga pengelikun rumah ngambika penusah ti baka tu ulih ditagang sereta diseliah dudi hari.