MATU: Dua iku lelaki tesat ngiga buah maram ba Jalai Jemoreng Passin mujur ditemu peranak menua nya lemai ensana pengudah empat hari tudah tesat.

Nitihka penerang ari siku pemesai Raban Penyaga Orang Periman (APM) Matu, Lt (PA) Jumaat bin Akasas madahka sida nerima berita ari Pengulu Jemorang ke madahka tudah mujur ditemu peranak menua nya empu urung pukul 7.45 lemai kemari.

“Tudah Mohamad Kael Abdullah tauka Tony, 30, enggau Nazif Qabil Muhimin, 15, ditemu bala mayuh enda jauh ari endur tudah ke masuk ngagai endur seduai ngiga buah maram nya urung 2 kilometer (km) penyauh,” ku Jumaat.

“Maya operasyen begigaka tudah, peranak menua nya tetemuka tudah ba tisi jalai besai Jemorang Bawang,” ku tandu Jumaat.

Nitihka penerang ari tudah, seduai iya masuk ke dalam babas urung 2 kilometer (km) ari jalai besai Jemoreng Bawang sebedau seduai iya biluk ke kanan ngagai Jalai Jemorang Passin.

Ku padah Jumaat, tudah madahka diri semina makai kemiding enggau daun babas ke bukai maya ke tesat empat hari pengelama nya sereta suah ngidupka unggun api kayu.

“Seduai iya mega madahka diri bisi ningaka bunyi azan enggau bunyi merechun lalu ba hari keterubah seduai tesat seduai bisi ninga bunyi tinso,” ku Jumaat.

Kenu ku Jumaat, berebak enggau penusah nya, sida nerima infomasyen keterubah kena ke 6 Mac 2022 (Hari Minggu) urung pukul 7.36 lemai ari apai Nazif.

Kenu ku padah apai Nazif nya, anak iya Nazif enggau siku kaban iya ke benama Tony apin ngemansutka diri pengudah seduai iya berengkah ngiga buah maram nya pukul 3.30 lemai nya ba Jalai Jemoreng Passin.

Taja pia, raban APM berengkah ngaga operasyen begigaka tudah kena ke 7 Mac 2022 (Hari Satu) meda tudah apin ditemu.

Nambahka nya, Jumaat madahka ba hari ketiga (kemari) operasyen begigaka tudah, raban APM magi tim sida ngagai enam iti tim, tiga iti tim muak ke pagi lalu tiga iti tim muak ke lemai.

“Maya ke ditemu lemai kemari, tudah nadai ditemu bakal ba tubuh tang semina lembut tulang aja tegal enda makai,” ku Jumaat.