Dua iku pesakit Covid-19 peranak Indonesia benung digiga

KUCHING: Sarawak kemari ngerikodka tiga kes baru positif covid-19 lalu semua sida ke dirampit nya bela peranak Indonesia sereta dikategorika kes Import A.

Berindik ari nya, penyampau semua kes ba Sarawak diatu niki ngagai 1,108 kes.

Bepelasarka penerang media Komiti Penyangga Penusah Nengeri (JPBN) Sarawak, ba kes kena rampit sehari tu siti kes ba Pelilih Kuching enggau dua kes ba Pelilih Asajaya.

Ungkup kes ba Asajaya, dua iku orang nya ngelelangka diri pengudah beperesa Covid-19.

“Seduai nya kebendar bela deka diambi pengaji gawa ba pelilih Asajaya pengudah ke betemu ba Kuching.

“Nitihka pansik tumu, kes tu ngembuan sejarah gawa ngena chara sah ba Sarawak kenyau Disember 2019 ba sebuah kedai makai ba Kuching sebedau ke pulai ke menua asal sida kena bulan Julai tu tadi.

“Udah nya, kes datai baru ke Sarawak ngena jalai chit kena 25 Disember,” ku penerang JPBN nya.

Nya alai, Opis Pengerai Nengeri (JPN) Sarawak enggau unit Pengelikun Enggau Penerit Adat Nengeri (UKPN) Sarawak benung mansik.

Semua kes nya nadai mandangka sebarang kelai kena rampit Covid-19.

Suara Sarawak