KUCHING: Pengawa ngaga Jalai Besai Tebing Tasik enggau Jalai Besai Kedua ti beungkus RM11 bilion lalu dipelanja Perintah Sarawak disadang tembu ba taun 2026, ku Premier Datuk Patinggi Tan Sri Abang Johari Tun Openg.
Ku iya, tuju program nyendia infrastruktur ti besai nya ngambi ngemanahka agi sistem penyambung jalai alun ti nyadi penyungkak ekonomi nyulut agi enggau juluk nempa Sarawak nyadi nengeri maju bepenatai pemisi tinggi manggai ba taun 2030.
“Kelimpah ngaga Jalai Besai Pan Borneo ari Perintah Besai, Perintah Sarawak mega benung ngaga jalai besai tebing tasik sepemanjai 896 kilometer (km) ti beungkus RM5.42 bilion.
“Jalai besai tu mungkur pengawa ngaga 10 jematan meraka sungai besai baka Jematan Batang Lupar sepemanjai 4.8 km ti endang jematan pemadu panjai meraka sungai ba menua tu enti udah tembu ila,” ku iya.
Abang Johari nyebut pekara nya ba Pengawa Nutup enggau Makai Malam Kembara Kenali Borneo ti diatur Perintah Sarawak ditu, malam ensanus.
Kelimpah ari nya, iya madah, Perintah Sarawak mega benung ngaga Jalai Besai Kedua ari Samarahan nuju utara nengeri nengah sitak Sebuyau enggau Lingga ti beungkus RM5.58 bilion.
“Jalai besai tu ila deka ngemandak timpuh pejalai ari Kuching ke Sibu ari lima ke enam jam diatu ngagai dua jam setengah aja.
“Kelimpah ari nya, kitai mega benung bejalaika program nyendiaka bekal kuasa karan nengah inisiatif Skim Elektrik Alternatif Menua Pesisir Sarawak (SARES) sereta bekal ai nengah Projek Bekal Ai Alternatif Sarawak (SAWAS).
“Semua projek tu beguna ke ungkus penyampau RM5 bilion ti dipelaba tembu ba taun 2025 lalu fasiliti Internet deka dikemanahka agi nengah arus 4G,” ku iya.
