Dua kluster baru : Kluster Ulu Anap enggau Kluster Emperan

KUCHING: Dua kluster baru ditemu sehari tu iya nya Kluster Ulu Anap, Tatau enggau Kluster Emperan, Selangau.

Komiti Penyangga Penusah Nengeri (JPBN) nengah penerang media iya madahka Kluster Ulu Anap ngaul sebuah komuniti rumah panjai di Ulu Sungai Anap, Nanga Tau di Tatau, Bintulu.

Kes indeks kluster tu ngaul siku indu beumur 38 taun ti gawa ba sebuah serikat peribit ba sebuah sekula primari di Nanga Tau, lalu iya ditemu positif Covid-19 kena 1 Mei.

Kluster Emperan mega ngaul sebuah komuniti di tiga buah rumah panjai ba Selangau.

Kes indeks tu ngaul siku indu beumur 27 taun ti gawa nyadi kerani ba sebuah opis perintah di Pakan, Selangau.

Nya ngujungka bisi 78 kluster dirikodka agi ngerekai ba Sarawak ke alai 17 kluster bisi nambah kes baru kemari lalu 61 kluster ke bukai nadai nambah.

Berebak enggau nya, penerang nya madahka pelilih menua ba status gadung enggau mirah sama bisi nambah sehari tu.

Pelilih menua ba status gadung nambah lebuh Telang Usan pulai bebali ari status kuning pengudah nadai ngerikodka kes berampit dalam timpuh 14 hari.

Nya ngujungka pelilih menua ba status gadung bisi tiga buah.

Pia mega enggau pelilih menua ba status mirah ti nambah pengudah Tatau bebali ari status oren ketegal ngerikodka 42 kes berampit dalam timpuh 14 hari ke udah.

Nya ngujungka pelilih menua ba status mirah nambah ngagai 28 buah.

Naka diatu, pelilih menua ba status kuning bisi semilan buah lalu pelilih menua ba status oren nadai agi.

Suara Sarawak