Dua kluster baru nambah di Sri Aman enggau Bintulu

KUCHING: Opis Pengerai Nengeri Sarawak udah ngenukuka dua kluster baru dirikodka ba Sarawak iya nya Kluster Sebangkoi di Pelilih Menua Sri Aman enggau Kluster Jun Heng di Pelilih Menua Bintulu.

Komiti Penyangga Penusah Ngenyit Nengeri (JPBN) dalam penerang media kemari madahka Kluster Sebangkoi ditemu ba komuniti bepun ari sebuah ruang bilik.

Kluster ti berampit ketegal kaul rama kes indeks di genturung Sebangkoi, Undop di Pelilih Menua Sri Aman.

Asil pansik ngagai orang bekaul ngagai kes tetemuka 20 iku orang positif betambah lalu naka kemari bisi 197 iku orang udah diperesa.

Ari peresa nya 21 iku ditemu positif, 80 iku negatif ke alai 96 iku agi nganti pemutus peresa makmal.

Nangkan nya, Kluster Jun Heng mega ditemu ba komuniti ti ngaul palan bebeli barang di mengeri Bintulu.

Kluster tu datai ari kes indeks ke-4,300, siku lelaki menyua ti ditemu positif kena 28 Januari.

Kes tu udah ngerampit ruang bilik sereta bakih sama gawa enggau iya.

Asil pansik udah tetemuka 18 kes positif lalu naka kemari bisi 102 iku orang udah diperesa.

Ari penyampau nya, 19 ditemu positif sereta 83 iku agi nganti pemutus peresa makmal.

Diatu Sarawak ngerikodka 14 kluster iya nya Kluster Sebangkoi, Kluster Jun Heng, Kluster Bintang Daily, Kluster Jalan Pengiran, Kluster Tabong, Kluster Indah Riang, Kluster Bedayan, Kluster Rakut, Kluster Bukit Sekubong, Kluster Jelita, Kluster Pasai, Kluster Keranji Tabuan, Kluster Bah Sayap enggau Kluster Stutong.

Berebak enggau nya, Pelilih Menua Kuching ditukuka pulai bebali ari status mirah ke status oren kemari pengudah semina ngerikodka 35 kes berampit dalam timpuh 14 hari.

Pelilih Menua Beluru, Kapit, Song, Dalat, Bintulu, Kanowit, Miri enggau Sibu mengkang ba status mirah ke alai Pelilih Menua Matu, Sri Aman, Selangau, Bau, Lundu, Subis enggau Betong ba status oren.

Pelilih Menua Sarikei, Daro, Sebauh, Lawas, Telang Usan, Bukit Mabong, Tatau, Pakan, Serian, Belaga, Meradong, Julau, Simunjan, Lubok Antu enggau Samarahan mengkang ba status Kuning lalu semilan pelilih menua bukai ba status gadung.

Suara Sarawak