Dua lelaki lepas ari tuduh munuh

SIBU: Kort Tinggi ditu ngelepaska dua lelaki ari tuduh kes munuh ba ladang sawit di Ulu Sungai Arip, Balingian kandang dua taun ke udah, kemari.

Seduai nya lepas pengudah diperintah Akim Dato Lee Hee pengudah piak bedawa puntan mantaika sebarang bukti bukai nitihka pematut.

Galang Imbang, 57 taun, enggau Lasa Sulau, 66 taun, lepas laban sida ti ngempu dawa ba kes bunuh puntan mantaika bukti nitihka tuduh kes nya.

Dulu ari nya, Galang didawa di baruh Seksyen 302 Kanun Keseksaan ti mai ukum mati enti ditemu salah.

Lasa Sulau didawa nitihka Seksyen 307 Kanun Keseksaan ke mai ukum jil nyentuk 20 taun enti ditemu salah.

Dalam bulan April nyin tadi, seduai ti dipechara begulai udah diperintah ngetanka diri pengudah kort mutuska kes prima facie udah dibukti.

Seduai dua didawa ngereja penyalah nya kena 24 Oktober 2016 entara pukul 5 lemai ngagai 7.55 lemai di Ulu Arip, Jalai Sibu-Bintulu.

Bepelasarka tuduh, Galang didawa munuh Fabian Lebau, 29 taun, seraya Lasa dituduh nimbak ngena senapang nuju Gleneker Julin enggau Luis Lawrence ngujungka seduai nya bebadi nyawa.

Dawa diatur Sapit Pendakwa Raya Musli Abdul Hamid, seraya Galang enggau Lasa bela diarika luyar Louis Jarau enggau luyar Abun Sui Anyit.

MENANG KES… Luyar Abun Sui (tengah) disempulang kaban belayan Galang enggau Louis ba mua Kort Tinggi Sibu, kemari.

Suara Sarawak