BINTULU: Dua iku lelaki ditemu retung ba penusah angus ke nyadi ba sebuah rumah kantin di Usaha Estate Jalai Tebing Pantai Bintulu-Miri urung pukul 9.05 lemai kemari.
Kepala Opis Pengerara Api enggau Penyah Penusah Pelilih Bintulu, Christus Buson madah, ba penusah nya dua iku lelaki ke ditemu retung iya nya Wong Ling Poung, 47, enggau Lee Hua Hing,23.
“Dua lelaki tu ditemu lebuh piak kami ngerara api lalu tepeda siku orang udah retung ba bilik tinduk enggau siku agi ditemu ba kaunter bebayar kantin nya,” ku iya.
Iya mansut ke penerang nya ngagai pengarang berita di Bintulu, pagi tadi.
Nangkan nya iya madah, bangkai dua iku orang ke retung nya udah diserahkan ngagai piak polis ngambi ke dipansik silik,” ku iya.
Berebak enggau Christus madahka, naka tu pun penyadi ke ngasuh rumah kantin nya angus agi dipansik.
