Dua malam lenyau, ditemu selamat

BARIO: Siku orang tuai beumur 99 taun ke dipelaba lenyau ba babas kira dua malam ke udah maya nurun ngiga kayu api kena Hari Empat tu tadi udah mujur ditemu, kemari.

Ketuai Opis Bomba enggau Penyah Penusah Miri, Law Poh Kiong nengah sebengkah penerang ngenuku orang tuai nya mujur ditemu seraban tim Operasyen Nyidi enggau Mantu (SAR) dalam radius dua kilometer ari rumah lelaki nya urung pukul 1.25 lemai.

Kenu ku iya, orang tuai nya diripotka lenyau kena Hari Empat tu tadi pengudah ke nadai pulai ke rumah lepas nurun ngiga kayu api ba kandang babas Arur Ritan Pa Lungan.

“Raban SAR mujur tesidika tudah tuai ari bekau kaki iya ti nurun ari rumah maya hari iya diripot lenyau.

“Tudah tuai ditemu selamat sebedau dibai raban SAR pulai ke rumah,” ku iya madah nengah sebengkah penerang kemari.

Tandu iya, pejalai nengah darat ari Marudi nuju ke palan penusah ngambi awak dua hari sebedau ke datai ba palan penusah nyadi.

Dulu ari nya, raban SAR nyengkaum Raban Soldadu Malaysia (ATM), Polis Diraja Malaysia (PDRM), Gerempung Bomba Volunteer Bario, Bomba Komuniti Pa’Lungan sereta peranak genturung pendiau ke besemak.

GAYU… Tudah siku lelaki ke udah lunggar umur ditemu selamat pengudah dua malam lenyau rambau ngiga kayu api.