KUALA LUMPUR: Dua Kaban Parlimen (MP) ari Sabah enggau Sarawak sehari tu minta agih belanja besai agi diberi ngagai kededua nengeri nya dalam Bajet 2021 ngambi ngerapitka takah pemansang enggau Semenanjung Malaysia.
Ba jurai Perambu Undang-undang Perbekalan 2021 ba Aum Parlimen ditu, Datuk Seri Mohd Shafie Apdal (Warisan- Semporna) madahka Sabah mesti nerima agih belanja ke besai agi nitihka pematut dalam bajet nya beduduk ari mayuh rayat seranta taja nengeri nya ngundan mayuh pengeraja asal.
Ku iya, pengelebih Sabah enggau Sarawak ti ngembuan mayuh tanah ami sereta pemayuh pengeraja asal mesti dikemansang nentuka menua makin maju kelimpah ulih besemekih enggau menua ba rantau Asia sereta dunya.
“Ari semua agih belanja penyampau RM322.5 bilion dalam Bajet 2021, Sabah semina nerima RM5 billion tauka RM9 bilion lalu pekara nya mesti dikemerat ngambi pemansang ba selampur menua sebela agi.
“Nitih ku penerang, sistem perengka pengangkut ba Semenanjung mega moden agi dibanding Sabah enggau Sarawak ti agi jauh tinggal,” ku iya nyemetak madah.
Iya mega merambu pengempu bas mit ba menua ulu tauka genturung pendiau dibantu lebuh disuwa enggau nyadi bas mit mai pesakit menua pesisir ngagai sepital.
Penemu tu mega ulih mantu pengempu bas mit nambahka penatai pemisi sida diatu.
Nangkanka nya, Larry Sng (PH-Julau) madahka Sabah enggau Sarawak begunaka agih belanja tambah ngambi ngerapit takah entara dua nengeri nya enggau Semenanjung Malaysia.
Ku Laryy Sng, perengkaguna pemun ba Sabah enggau Sarawak agi jauh tinggal
“Ambika banding ba kandang menua Julau, Sarawak pemesai nengeri perlis enggau Melaka nadai stesyen minyak tauka balai bomba.
“Ari sukut pengerai, ba Sabah semina bisi sebuah klinik ungkup 13,129 iku seraya sebuah klinik ungkup 11,682 iku peranak ba Sarawak iya nya dua kali lipat tinggi agi ari Pahang (1: 5,048),” ku Larry Sng nerang.
Iya mega madahka inisiatif ngerapit takah digital enggau penanggul arus penyambung dirumban nyengkaum ngemanah 2,041 tiang pemanchar ba Sarawak ngagai arus 4G laban arus penyambung nya beguna amat maya nelebaka diri enggau chara baru tu.- BERNAMA.
