KUCHING: Menteri ba Opis Menteri Besai (Parlimen enggau Undang-Undang) Datuk Seri Dr Wan Junaidi Tuanku Jaafar nyemetak madah bisi dua pekara patut digaga sebedau Pengawa Bepilih Besai Nengeri ke-12 (PRN12) ulih diatur ba Sarawak.
Kesatu ku iya, timpuh darurat ulih ditetak Yang di-Pertuan Agong nyema patut ngambika PRN12 ulih diatur ba nengeri tu.
Udah nya, pekara ti kedua ku iya, pengawa bepilih besai ulih diatur nyema Yang di-Pertuan Agong setuju pengudah berandau enggau Tuai Pemegai Menua (TYT) enggau Kepala Menteri.
“Pekara ke nyadi tanda tanya kemaya deka diatur (PRN12), anang nanya aku laban tu endang bidang kuasa Yang di-Pertuan Agong, TYT Negeri enggau Kepala Menteri,” ku iya maya aum pemberita pengudah Pengawa Nasih Tanah Ngaga Baru Masjid Mutiara Iman Taman Sepakat Jaya 2 di Demak Laut, kemari.
Berebak enggau nya, Wan Junaidi mega madah chalun ke udah bisi ba tiga penuduk Kunsil Nengeri (DUN) ba sitak Parlimen Santubong agi ulih gawa sereta nerima sukung ari peranak menua nya.
“Aku bedau dipadah sekalika bisi betukar tang ba penemu aku ketetiga Adun iya nya Datuk Amar Jamilah Anu (Tanjong Datu), Datuk Dr Abdul Rahman Junaidi (Pantai Damai), Dr Hazland Hipni (Demak Laut) agi ulih bejalaika pengawa laban sida agi biak enggau disukung mensia mayuh,” ku iya.
Kelimpag ari nya, bela dipadah iya deka meri kerejasama penuh ngagai perintah nengeri negika hak-hak Sarawak nitihka Sempekat Malaysia 1963 (MA63).
“Undang-undang ke dipeda kitai diatu iya nya pengawa ngaku Sempekat Malaysia 1963 chukup beguna nyadika malin.
“Maya datai ba Parlimen ila kitai ulih berundingka ungkup pemendar laban renggat keterubah udah ulih,” ku iya.
