KUCHING: Chalun Gabungan Parti Sarawak (GPS) ke bediri ba lapan penuduk majoriti pengundi Bidayuh ba Pengawa Bepilih Besai Nengeri Ke-12 (PRN12) tu diambaka deka bendar bepupuh lebih agi ba dua sitak ti diarika chalun baru.
Kenu ku Pemikir Politik Dr. Ahi Sarok, dua chalun baru tu iya nya di Billy Sujang enggau Dr.Simon Sinang Bada ti deka nguji ngenanka menalan ungkup sitak Dun Opar enggau Tebedu.
Ambika banding di Opar, Billy deka besatup enggau lima chalun bukai nyengkaum penyandang ari Parti Sarawak Bersatu (PSB), Datuk Ranum Mina ke udah bebebendar gawa kenyau empat taun ke udah.
Taja pia, pemansang ba endur diperati kurang pengudah Ranum nadai agi sebilik enggau perintah.
“Nya pengundi beratika pemansang ke kurang ba endur nya tentu sida deka milih Billy Sujang.
“Tang ba siku agi chalun ari PH-PKR ditu (Opar), iya (Meneng Biris) tentu deka disaup Kaban Parlimen Mas Gading (Mordi Bimol).
Ngelansa sentang Dun Tebedu, Dr. Ahi madah pekit lima penjuru mungkur chalun GPS, Dr Simon deka besatup enggau Senior William Rade ari PKR, Jonathan Lantik (PBK), Roland (Bebas) enggau Raymond Achen (PSB).
Ditu Dr. Simon deka ngena kasut besai ke udah ditinggal penyandang iya nya Datuk Amar Micheal Manyin Jawong.
Taja pia, Dr. Simon udah lama dikelala rayat laban iya udah 25 taun begulai enggau nyempulang Manyin ngemansangka sitak nya.
“Nya alai, nyema dipilih nyadi pengari rayat iya deka neruska perambu Manyin enggau terus ngemansangka pelilih Tebedu.
“Rayat Tebedu tentu agi randaka pemansang infrastruktur baka jalai raya ke patut dikemanah bepun ari Jalai Temong-Tepoi-Annah Rais.
Enti deka menang ba Tebedu, chalun GPS mesti ngatur strategi matak ati pengundi lebih agi ari Kampung Piching enggau Taie ke mega asal chalun ke dilaban.
Manyin ke mega Direktor PRN12 ungkup Tebedu tentu meri perati ke patut ungkup sitak angat iya nya Kampung Taie.
Dr Simon patut pintar matak ati pengundi lebih agi raban orang biak laban sida tu mudah nitih pengasai ati.
Ungkup penemu, lapan penuduk majoriti Bidayuh iya nya Opar, Tasik Biru, Tebedu, Kedup, Mambong, Tarat, Bukit Semuja enggau Serembu.
