KUCHING: “Sida kala nguji deka nyuap aku enggau duit RM30,000, tang aku nulak,” ku Mohammad Norazlan Jamil, 37 siku penerima setipikit basa integriti Sarawak Forestry Corporation (SFC).

Ku iya, sida suah deka disuap orang ti enda ngembuan tanggungpengawa lebuh ngatur operasyen.

“Bisi dua kes sida nguji deka nyuap aku, sekali lebuh aku di Kapit enggau siti agi lebuh aku ba Sarikei.

“Keterubah nya sida nguji deka nyuap aku RM10,000 lalu kedua sida nguji deka nyuap aku RM30,000, tang aku nulak,” ku iya.

Mohammad Norazlan bejaku munyi nya lebuh ditanya pemberita pengudah nerima setipikit basa integriti rambau Hari Integriti SFC di Palan Aum Borneo Kuching (BCCK) ditu, kemari.

Ku iya nusi, pekara nya nyadi lebuh sida nangkap pengawa dagang nadai pemendar nyual pala burung Kenyalang, empedu jugam, tisik tengiling enggau ke bukai.

“Kes keterubah nya, ungkus barang dirampas urung RM30,000 ngagai RM40,000 ke alai kes kedua dipelabaka beungkus RM700,000.

“Sida mega nguji deka mayar aku RM25,000 ninting bulan, tang aku enggai,” ku iya.

Lebuh ditanya nama kebuah iya nulak, Mohammad Norazlan madahka iya bepegai ngagai tanda nama di dada (ingat lambang ba dada).

“Kitai patut ngerunding anak, bini, apai enggau indai laban nyema kitai kena tangkap sida pan napi penusah.

“Aku mega deka ngetanka nama manah SFC laban nyema aku nerima duit sida, aku enda ulih ngaga kereja aku empu agi,” ku iya.

Kelimpah ari nya, siku agi penerima setipikit basa integriti kemari, Mohd Arif Suhai, 32 madahka iya mega kala deka disuap enggau duit RM5,000.

“Maya nya, kami nangkap sebuah lori mai kayu nadai permit.

“Iya minta aku ngelepaska lori enggau kayu nya lalu nguji deka nyuap nengah duit RM5,000,” ku iya.

Ku Mohd Arif, iya udah nya lalu ngeripot orang ti deka nyuap nya ngagai Komiti Besai Nangang Penyalah Makai Suap (SPRM).

“Dalam Islam kitai nemu pengawa makai suap endang salah, nadai manah kitai nupi anak bini ngena duit ti salah.

“Ninting maya dalam televisyen pan kitai selalu meda pesan anang ngaul diri dalam pengawa salah makai suap, nya kebuah aku nulak,” ku iya.

Arif madahka sepengelama 11 taun udah gawa dalam SFC tu meh kali ti keterubah iya diuji.

“Lebuh kitai meda bisi pengawa enda betul jampat ngaga ripot ngagai tuai.

“Anang dampih enggau pengawa salah makai suap laban sekali kitai udah kena, pengawa nya tusah dibuai,” ku iya.