JAKARTA: Siku tuai opis perintah ba wilayah Lampung Utara ditipu siku manang bula ti ulih nukar duit 73.5 juta rupiah (RM22,138) nyadi tiga bilion rupiah (RM903,598).
Tuai Polis Pesisir Tengah, Komisioner Polis Zaini Dahlan madah, kes nya bepun lebuh manang nya madahka lelaki nya deka bulih duit sepenyampau dua billion (RM602,369) enti iya meri 30 juta rupiah (RM9,035).
Laban pechaya enggau jaku manang nya, dia lelaki nya nyua duit sepenyampau nya ngagai manang nya lalu diengkah dalam kantung gari sereta disimpan ba bilik iya empu.
Udah nya, manang nya ngelulu diri macha puchau ngagai kantung nya seraya madah, lelaki nya deka bulih tiga billion rupiah (RM903,598) enti iya nambahka baru duit 9.9 juta rupiah (RM2,981).
Pia mega, lelaki nya dipinta nambahka baru duit 19.8 juta rupiah (RM5,962) enti iya deka ngemandakka timpuh dikena ngulihka duit nya ti ulih nambah belipat ari 40 hari nyadi 20 hari.
Kena 5 Ogos tu tadi, manang enggau lelaki nya ngaga pengawa miring ba bilik lelaki nya ti dikunchi pengelama tiga jam.
Pengudah pengawa nya tembu, manang nya madahka duit lelaki nya udah diengkah dalam kantung ba atas tilam ba rumah iya tang lebuh lelaki nya muka kantung nya, iya balat tekenyit tetemuka bantal enggau pua aja dalam kantung nya.
