SONG: Sitak Kunsil Nengeri (Dun) Katibas deka terus dikemansang nitihka peminta peranak ba menua nya, ku Lidam Assan.
Kaban Kunsil Nengeri (Adun) Katibas nya madah diri besemaya deka ngemujurka langgur pemansang ti udah dirintaika ungkup sitak nya.
Ku Lidam, entara langgur pemansang tu ila iya nya nyengkaum insfrastruktur, pelajar sekula, agroteknologi, eko-dagang temuai enggau mayuh agi.
“Langgur tu endang datai ari buah runding ti kolektif ke dibantaika rayat mayuh nengah komen sida iya ngagai aku.
“Semua tu ila deka digaga enggau dibaruh kemata sekeda ejensi perintah ambika pengawa tu mujur sereta terus dipejalaika,” ku Lidam.
Lidam mansutka jaku tu lebuh iya diberi peluang bejaku mantaika langgur pemansang ba baruh Agih Belanja Khas Ejensi Pemansang Ulu Rajang (Urda) empai lama.
Ku tandu iya, Sungai Katibas enggau Sungai Song sereta mayuh agi sungai udah ditemu lalu nyadi reta menua ti chukup berega.
Lidam madahka, tu mih peluang ke patut dikena sida iya ngaga pengawa pemansang ke bebida enggau menua bukai ari segi eko-dagang temuai.
“Enggau gaya rampa menua sereta tanah ti chukup manah, tu endang ulih meri pengelebih ngagai kitai (Katibas).
“Entara pengelebih iya nya ari sukut pemansang nengah agriteknologi ti bedau kala dikena kitai ngelama tu,” ku Lidam.
