Dun Tellian majak dikemansang

KUCHING: Projek jalai alun ari Baoh Ulu ke Nanga Baoh udah meri pemaik besai ngagai 24 rumah panjai ngelingi menua nya.

Adun Tellian-PBB, Yussibnosh Balo madah, 10 buah rumah panjai ari Nanga Baoh ulih disambung ngagai 14 buah rumah panjai di sitak Baoh Ulu lalu ngelawa Pasar Selangau.

“Sebedau tu, peranak di Nanga Baoh semina nengah jalai ai enti nurun ke pasar pemadu semak iya nya Dalat enggau Stapang.

“Pejalai ngili Batang Oya jauh amat sereta besai belanja dikena bebelika minyak, ngelui ari dua jam pengelama,” ku iya.

Nya kebuah ku iya, pengawa ngaga rentayan jalai di kandang menua nya deka ngemuntangka agi sida mindah.

Yussibnosh Balo

Iya mansutka jaku nya lebuh mantaika jurai basa nimbal jaku TYT Tun Abdul Taib Mahmud rambau Aum Keterubah Penggal Keempat Aum Dun Ke-18 ditu kemari.

Pia mega ku Yussibnosh, 10 buah rumah panjang nyengkaum sebuah sekula enggau klinik pengerai ngasaika bekal ai beresi nengah Skim Bekal Ai Alternatif Sarawak (Sawas).

“Dun Tellian nerima agih belanja besai ti mungkur sitak Nanga Baoh, Dalat dalam projek Sawas.

“Projek tu ngemai pengidup baru ngagai peranak kelebih agi hari besai ti deka diintu enda lama agi,” ku iya nerang.

Iya mega beterima kasih ngagai perintah ti udah numbuhka Palan Pemansang Pengelandik Sarawak (PPKS) Mukah disadang tembu ujung taun tu.

“Palan tu deka diberi nama Kolej Pertanian Pintar ti deka nyendiaka kus bekaul enggau pengawa betanam betupi moden.

“Projek tu dipelaba ulih nampung 600 iku nembiak dalam siti timpuh,” ku iya nerang silik.

Nya alai iya chukup lantang ati meda pengeran Perintah Sarawak bejalaika pengawa pemansang di sitak Tellian.