Duti Eksais ai irup begula diterit 1 Julai

KUCHING: Duti Eksais RM0.40 seliter deka dipejalai ngagai produk ai irup begula ti ngembuan gula lebih ari tikas sengkan (threshold) ti udah ditetap enggau sedia diirup.

Direktor Kastam Nengeri Datuk Sharifah Halimah Tuanku Taha madahka atur tu udah diterit berengkah ari 1 Julai tu tadi.

“Berengkah ari 1 Julai 2019, import enggau kilang ai irup begula ngasika Perintah Duti Eksais 2017.

“Dagang import ai irup begula ti dilepas patut dipadah ba Pom Kastam 1 (K1) sebaka enggau barang import bukai lalu Pom Eksais 7 ungkup pengilang belisin enggau bejual di menua tu,” ku iya ba penerang berita, kemari.

Ku iya, tu enda nyengkaum produk nadai disengkaum ba kategori ti udah dipadah.

“Produk bukai enda dikategori dipadah deka dikelaung ari Perintah Duti Eksais (Pengecualian) (Pindaan) (No.2) 2019.

“Enggau atur, sida mantaika Ripot Makmal (Lab Report) ari Opis Kimia Malaysia lebuh nganjung Pom K1,” ku iya.

Kelimpah ari nya ku Halimah, sebagi ari pengawa deka ngemuntang pengimport ba timpuh bekalih ari 1 Julai ngagai 31 Ogos tu.

“Sida diberi awak nangguh ari mantaika Ripot Makmal lebuh nganjung Pom K1.

“Taja pia, Ripot Makmal patut dibantai kandang 30 hari ari haribulan lepas Pom K1 dikemendar,” ku iya nampung.

Ku Halimah, bala pengimport patut ngaga Surat Akujanji, lalu enti isi gula lebih ari tikas sengkan tauka Ripot Makmal enda mujur dibantai ba timpuh ti udah ditetap, duti nya patut dibayar penuh.

“Pengawa mindah ari stesyen import semina dikemendar ngagai gudang di baruh Seksyen 65 Akta Kastam 1967 ngena Pom K8, lalu chara ngelepas ngagai makit menua semina nengah Pom K1.

Enti deka nemu pekara tu silik agi, mensia mayuh tau betelefon ngagai Palan Telefon Kastam ba lumbur 1300 888 500 ninting hari berengkah ari pukul 08.30 pagi ngagai 10.30 malam.

Penerang silik bekaul chara bejalaika duti eksais ai irup begula tau dibacha nengah website Opis Kastam Diraja Malaysia (JKDM) ba www.customs.gov.my/ms/pg/Pages/pg_mainssb.aspx.