e-Borneo ngidupka baru bup BLB

Inisiatif Dewan Bahasa dan Pustaka (DBP) Pampang Sarawak ti deka ngidupka baru Koleksi Borneo DBP ke mungkur kereban bacha ke kala dichelak Biro Litericha Borneo (BLB) dipasuk dalam pelasar digital e-Borneo patut dipuji sereta disukung lebih agi kitai Dayak Iban ke chukup rinduka cherita-cherita pengingat tuai Iban.

Pekara tu dikenukuka Direktor DBP Sarawak Abang Haliman Abang Julai rambau bejadika ‘Seminar Kearifan Tempatan Sarawak’ sereta Ngelancharka Pengawa Ngangkat enggau Mansik Jaku enggau Litericha DBP Sarawak kena 16 March tu tadi.

Nerang silik, Haliman madah pelasar digital tu ila deka ngempuruka bemacham kereban bacha ke bepenemu dikarang bala penulis Borneo bekaul enggau daya idup pekara bukai di Borneo ngambika ulih dibacha semua orang ba dedini endur.

Kelimpah bup ari Koleksi Borneo, kereban bacha ari Palan Dokumentasyen Melayu mega deka dipasuk dalam e-Borneo tu ke mungkur bup, asil pansik, keretas kereja, majalah enggau ke bukai nengah chara berenggat.

Maya berandau enggau ex-Pegawai DBP Sarawak ke mega Pegawai MAIS Jonathan Sinki Lintan bekaul enggau pekara tu dia iya madah pelasar e-Borneo tu kebendar udah lama digaga DBP, lalu iya empu siku ari orang ke enggau numbuhka pelasar tu ke dipenyadi di Kundasang, Sabah. Bisi dua tiga iti artikel aku bisi dipasuk dalam portal tu, ku iya.

Bup Sengalang Burong dikarang Benedict Sandin dichelak Borneo Literature Bureau.

Bekaul enggau perambu ngemasukka bup BLB dia ku iya, pengawa nya amat manah tang nyangka enda semua bup nya ulih dipasuk, dipelabaka semina kulit aja tauka sebagi ari prelims aja.

Udah nya, lebuh dipinta nimbal pasal e-Broneo tu, Penulung Direktor Publikasyen DBP Sarawak Edith Sulie Bidas madah pengawa tu amat manah laban kitai bela nemu diatu kereban bacha ke dikarang bala penulis jeman BLB endang nadai ulih digiga ba sebelah kedai tauka librari di menua tu.

Nya alai, ari pemisi pelasar digital baka tu iya endang pekara ke chukup manah enggau udah lama dianti raban peminat bup cherita pengingat tuai Iban.

Pia mega ari pemisi pelasar digital tu, kelimpah ari bup-bup lama kitai Iban, bup teks sekula dalam Jaku Iban mega deka dipasuk dalam e-Borneo tu, ku Edith.

Nyadi kilah ensana lebuh aku tepedaka siti posting bekaul pekara ke sama bisi dikunsika siku bakih ba media rama ke mega Pegawai DBP Sarawak Jaafar Hamdam bekaul enggau pekara tu, dia aku meda mayuh timbal positif ari penguna media rama ti bela nyukung perambu badas tu.

Ngelansa pekara bekaul enggau BLB tu, tu dikumbai kitai jeman emas iya nya berengkah taun 1958 nyentuk 1973 endur bup kereban bacha bekaul enggau cherita lama bansa Iban mayuh dikarang enggau dichelak.

Entara bala penulis bup BLB iya nya niang Benedict Sandin anak Attat chukup dikelala siku ari penulis bup Nendak, Sengalang Burong enggau ke bukai. Udah nya Richard Jua bisi nulis bup Lumpung Manding, Teni Geboh (Kumang Ngiga Lintum enggau Batang Mandai), Henry Gerijih (Satangkai), William Gieri (Bungai Nuing Ngamboh), Dunstan Entingi (Bujang Penerang), Peter Tadong (Pulau Dato Kong), Lawrence Sanoun Ijau (Salidi Seduai Sepatu), Joseph Achik (Ensera Tuai : Bintang Buyu enggau Bintang Timor), Tawi Ballai (Tembawai Bejuah), Norman Rundu Pitok (Salumpong Karong Besi) enggau ke bukai.

Ambika chunto, ngelansa jerita Pindah ke dikarang Benedict dalam bup Sengalang Burong dia bisi ngeripihka pasal pemindah bansa Dayak Iban ari Batang Kapuas ngagai Batang Ai.

Udah nya, ku iya ari Batang Ai, Iban terus mindah ke Jengin, Mujan, Engkari, mepi, Delok, Lemanak enggau Undop. Ari Undop pechah baru berimba menua Bukit Balau di Simanggang kelimpah mindah ke Sebuyau.

Pengudah berimba menua Sebuyau, Iban mega terus ngachir mindah ke Sadong nyengkaum ke Meredang Gayam, Meredang Lumut, Meredang Limau enggau Batang Samarahan sereta mega bisi kedua terus diau mendam di Lundu nyentuk ke sehari tu.

Di Undop, bala tuai Iban kelia sigi enda jenuh diau ba siti endur aja sekeda tuai ke endang berani terus mai bala anembiak sida mindah mungkal menua baru baka Skrang, Batang Tisak, Samudam, Layar, Semarang, Supa, Debak, Saribas, Paku, Berutan nyentuk ke Tanjong Melanyut.

Benedict bisi ngelansa baka ni pemindah Iban ari Bangat sereta Padeh lalu mungkal menua baru baka Kerian, Awek, Sabetan, Sabelak, Nyabur sereta ngelinggi Luba Rajang.

Udah nya bala Iban ari Skrang mega dicheritaka iya bisi mindah ke Kanowit, Entabai, Entaih, Wak sereta Julau. Bisi mega ngerembuska diri di menua Embawang Assan nyentuk ke sehari tu. Iban ari Batang Ai mega bisi pindah Batang Rajang, melunggang ke Katibas lalu bisi diau di Mukah enggau Ngemah. Enda tinggal dilansa iya pemindah Iban ke Kapit, Baleh enggau Mujong.

Pengudah menua majak kusi bala Iban dikemendar perintah mungkal menua baru baka Mukah, Oya, Balingian, Tatau, Bintulu, Suai, Niah, Sebuti, Baram, Limbang sereta Lawas.

Sekeda nama bala tuai Iban ke bisi disebut Benedict dalam jerita pindah tu baka Gelungan (parai di Sadong), Manggi (ditumbak ba Pendam Batu, Debak), Tindin (parai di Tanjong Melanyut), Talap, Patinggi Ngadan, Chaong, Gerijih, Begarak, Rentap, Mujah, Lang Ngindang, Matahari enggau Unggat.

Nyadi ku Benedict, semua Iban nya tadi endang diri sama diri. Sida datai ari siti pun lalu adat ke dipegai sida endang sebaka magang.

Nya alai, kitai ngarapka perambu ngemasukka koleksi Borneo DBP tu ulih nyadi nyata ngambika mayuh jerita pengingat tuai kelia ulih ditemu lalu dibacha raban nembiak rebak baru.

Jerita dalam bup BLB ukai semina jerita aja tang mega ngundan jaku ajar, daya idup, penti pemali enggau bemacham pekara ke bekaul ke pemaik pengidup.

Suara Sarawak