e-Broneo: Perambu manah laban senang dibacha

KUCHING: Dewan Bahasa enggau Pustaka (DBP) Pampang Sarawak bisi perambu deka ngemasukka kereban bacha ari Palan Dokumentasyen Melayu enggau Koleksi Borneo DBP ngagai digital dikumbai portal e-Borneo. Nyadi Suara Sarawak bisi ngerandau mensia mayuh bekaul enggau timbal sida sentang pekara tu.


Mohamad Mobun

“Tu pekara ti pemadu manah, laban siti ari penanggul orang ti diau ba menua pesisir iya nya sida mar mindah ngagai palan macha bup. Patut pekara tu udah digaga tumu agi awakka ulih datai ngagai nembiak enggau raban sekula ti jauh ari mengeri. Nyema bup udah digaga nyadi digital, nembiak di menua pesisir ulih belajar enggau meruan atas tali arus. Nya alai ngarika raban pengajar di menua pesisir aku endang nyukung pengawa DBP Sarawak tu.”

Jong Lin Lin

“Ba penemu aku, ngemasukka bup lama ngagai pelasar digital deka ngemuntangka raban pemacha ngiga bup lama nyadika malin sida kelimpah ngelimat awak baka nembiak sekula enggau nembiak ba palan pelajar tinggi. Taja pia, pemacha ti nadai nemu ngena teknologi baka komputer enggau telefon pintar nyangka deka mar mimit nerima pekara tu kelebih agi raban orang tuai.”

Gloria Arroyo

“Pengawa ngidupka baru bup lama kitai Iban nyadi digital deka ngemuntangka orang mayuh macha laban ulih dipeda enda ngira maya tauka dini alai kitai diau. Kelimpah ari nya, semua nembiak sekula diatu rindu agi belajar atas tali arus. Tu siti perambu ti chukup manah ngagai raban nembiak di menua pesisir ti napi penanggul meli bup.”

Suara Sarawak