e-Lumba diansah ba rumah panjai

SIBU: Pengawa ngatur e-lumba ba rumah panjai nyadi pelasar ngansah pengelandik nembiak ari menua pesisir.

Menteri Muda Pelajar, Sains enggau Pansik Teknologi, Dr Annuar Rapaee madahka, kandang menua pesisir enda dikelaung ngaul diri dalam e-lumba laban teknologi diatu nadai adan.

“Pengawa ngatur e-lumba sekali tu nyelai laban diatur ba ruai rumah panjai.

“Tu keterubah iya kitai ba Sarawak ngatur pekit nya di rumah panjai,” ku iya.

Dr Annuar mansutka jaku nya lebuh bejadika Pengawa Nutup Pekit Mobile Legends Nangka Challenge 2020 di Rumah Maxwell Albert, Batu 13, Jalai Oya, lemai Hari Minggu tu tadi.

Pekit nya diatur begulai enggau Palan Servis Dun Nangka, Komiti E Sport Nangka Challenge, Komiti Pemansang enggau Pengelikun Genturung Pendiau (JKKK) Rumah Maxwell, Briged Raban Nembiak Menua Pesisir N.55 Nangka enggau Biro Indu Menua Pesisir N.55 Nangka.

Bisi 30 tim udah masuk pekit ti diatur pengelama dua hari nya kena 5 enggau 6 Disember tu tadi.

Suara Sarawak