e-Wanita muntang dikena ngelaku produk dagang

KUCHING: Sistem e-Wanita deka ngemuntangka agi pengawa dagang orang indu ba menua tu.

Pemesai Penyambung Mensia Mayuh Socoe Sdn Bhd, Haziq Shahren madah tu siti pelasar ti dipandangka Opis Orang Indu enggau Ruang Bilik (JWKS) dikena orang indu lebih agi sida ke bedagang nyual sereta ngelaku produk sida.

“Socoe enggau kerejasama JWKS nguji deka mai mayuh agi orang indu ke bedagang nengah sistem e-Wanita.

“Naka ke diatu, mayuh raban JWKS udah ngerejista diri enggau e-Wanita,” ku iya.

Haziq madah munyi nya rambau dirandau raban pemberita Suara Sarawak di Dewan Bukavu ditu, kemari.

E-WANITA… Haziq (dua kiba) begulai enggau raban ke ngulu pengawa mungkus Pemeri Gawai-Raya 2019 di Dewan Bukavu, Kem Penrisen seraya ngelakuka sistem e-Wanita ngagai mensia mayuh.

Nangkanka nya, iya madahka sida ke udah ngerejista diri enggau e-Wanita lalu deka meli produk ba pelasar nya deka bukih diskaun.

“Diskaun 20 peratus deka diberi ngagai sida ke udah ngerejista ba e-Wanita lalu meli produk asil sida indu ke bedagang nengah e-Wanita.

“Diskaun tu deka berengkah 17 Mei tu,” ku iya lebuh dirandau.

Sistem e-Wanita siti chara dagang online ke ditumbuhka dikena ngemuntangka pengawa dagang orang indu ba menua Sarawak.

“Produk ke dikerembaik nengah e-Wanita tu semina asil jari asli ari menua Sarawak, nadai asil menua bukai.

“Nya alai e-Wanita tu siti chara ti mantu dagang orang indu Sarawak sereta ngelakuka produk sida ngagai menua bukai mega,” ku iya.

Kelimpah ari orang indu, sida ke lelaki ke deka meli produk ari e-Wanita tu mega ulih ngerejista diri sida ba e-Wanita.com, ku Haziq.

Apin lama ke udah, Kepala Menteri Datuk Patinggi Abang Johari Tun Openg udah bejadika dagang online e-Wanita ba Palan Konvensyen Borneo Kuching (BCCK) lalu tu nyadi siti chara nengeri ngemansangka ekonomi menua ngagai ekonomi digital.