Edwin Awis landik belagu, bekuntau enggau bepantang

Tiap iku kitai mensia diberi Tuhan ungkup, peluang enggau penau. Tuhan sigi badas lebih agi orang ti arapka iya. Bida siku-siku kitai mensia nya chara enggau penau kitai nguna pengelandik ti diberi Tuhan ke kitai.

Taja pia enti peluang enggau pengelandik udah bisi enti enda nemu nguna iya pan nadai pengujung. Orang ti beruntung nya orang ti ngembuan pengelandik lalu nemu nguna pengelandik nya ti tau mai penguntung.

Artis kitai minggu tu siku artis ke ngembuan tiga bansa pengelandik iya nya belagu, bekuntau enggau bepantang. Iya ti bendar tiga bansapengelandik nya tadi udah nyadi bansa dagang.

Kelimpah ari nya seni kuntau udah nyadi siti bansa main dunya. Bepantang mega diatu udah nyadi pengawa dagang ngagai semua ti rinduka pengawa nya.

Kitai Iban mengkang ngemeranka pantang asal Iban lalu bansa bukai mega bisi ngaga pantang tang ngemeranka motif moden.

Edwin Awis

Edwin Awis Joseph madahka penatai diri ari Ulu Sebetan Saratok. Anak ketiga ari lima iku diri menyadi, Edwin terubah chakah ba pengawa belagu dalam taun 2016.

Taja pan pia iya sebedau nya semina belagu kena merindang lalu bedau kala masuk pekit belagu ke besai tauka enggau orang audisyen pekit belagu.

Landik Belagu

Pengangkat tauka penatai siku-siku artis ke dunya pemerindang sigi enda sebaka. Sekeda artis belagu terus ulih ngerikod lagu tegal sida bisi duit.

Sekeda ke nyadi artis dulu enggau masuk pekit belagu tauka audisyen ke alai sida ditapis milih iya ke pemadu badas. Suah agi ke udah kala menang enggau pekit belagu lebih tan lama ba industri pemerindang.

Kebuah pia laban sida dikelala mayuh agi orang lalu sida nya nyadi peminat iya udah bisi album tauka solo.

Audisyen EMP Rising Star mai tuah ngagai Edwin. Taja enda nyadi champion ba pekit belagu nya suba tang diatu iya udah bisi siti lagu tauka solo.

Album solo nya dijangka ulih didinga ba radio pun taun 2020 nyin ila. Edwin siku ari 50 iku bala ti enggau audisyen maya nya suba. Udah dipilih nyadaka siti lagu single ari Extreme Music Production tau dikumbai benasit.

LANDIK MANTANG…Edwin benung mantang siku temuai.

Ngeluarka lagu solo udah nyadi siti ‘trend’ diatu. Kebuah pia laban ungkus iya murah agi lalu jarang ngasuh rugi. Diatu ngeluarka siti album penuh abis nadai nguna belanja RM10, 000.

Tang enti kitai semina ngeluarka siti album solo nyangka tau kurang tauka semina manggai ngagai RM1000 aja. Ba siti album penuh, nadai mayuh lagu ti ulih nyadi lagu tebilang ambis mayuh dua iti.

Trend ngeluarka album solo mega bisi pemanah laban enti orang nya terubah iya aktif belagu tang terus ngaga album penuh, dia iya tau pulai ke pengerugi besai enti sema lagu enggau vokal iya enda diterima prminat.

Ngeluarka album solo dulu bisi pemanah laban dikena ngabas kualiti diri nyadi artis rikoding. Lagu Aku Kesulai Nuan Bungai digaga Mike Poisner lalu dikeluarka Extreme Music Production (EMP) ke bepalan di Johor Bharu.

Mike Poisner nya siku ari komposer EMP. Iya mega chakah ngatur pengerami pemerindang nyengkaum pekit belagu. Sida bukai ba EMP nya Ricky Ajsn, Randy, Lalak JB enggau sekeda ke bukai.

LANDIK BEKUNTAU…Edwin mujur nembuka pelajar kuntau lalu nerima setipikit ari siku guro kuntau.

Landik Bekuntau

Pengelandik kedua ti dikembuan Edwin nya kuntau. Diatu kuntau enggau seni silat ke bukai majak tebilang ke alai majak mayuh belajarka iya.

Seni silat ambika chunto udah nyadi siti main ba pekit lumba enggau main di menua tu. Kitai arapka kuntau ulih mega nyadi siti ari bansa pekit ba Lumba Malaysia tauka ba nengeri Sarawak jemah.

Nembiak kemaya hari udah mayuh nemu pemesai guna main asal kitai Iban. Nyau majak mayuh palan endur belajar kuntau tauka silat. Edwin mega siku ari orang ti udah enggau belajar kuntau lalu udah nerima sitipikit tamat belajar.

Landik Bepantang

Siti agi pengelandik ke bisi Edwin nya mantang orang. Dunya pantang diatu majak besai lalu peminat iya majak mayuh. Bisi mega orang bulih penatai
pemisi ari bisnes pantang.

Ngagai kitai ti deka nguji bepantang ba Edwin kita tau ngiga iya ba nombor 013-5923230. Diatu Edwin gawa di Samalaju di Bintulu lalu ngagai kita ke diau di Bintulu tau betemu terus ngelawa iya.

Edwin tau ngumbai diri empu beruntung laban ngembuan pakej pengelandik ke chukup. Enti iya nemu nguna pengelandik iya mantang, kuntau enggau
belagu, iya ulih ngaga nya nyadi lubang penatai pemisi diri empu.

Belagu sambil bekuntau mega ulih nyadi siti pemerindang ke siku-siku artis. Kitai arapka Edwin terus mujur ba dunya seni iya kelebih agi ba pengawa pemerindang.

Arap mega iya mujur ba dagang bepantang enggau kuntau. Enti dikena enggau chara ti betul, tiga bansa pengelandik nya tau mai ngagai jalai pengidup ti manah. Anti mih album solo ari Edwin, Aku Kesulai Nuan Bungai ti deka dikeluar ba pun taun baru.