KUCHING: Ejen ti bekaul dalam kes sebuah serikat ti muka skim pemeranak puku ngaga rumah bula ulih didawa laban nya siti pengawa salah.

Sekretari Besai Serakup Pekara Mensia Antarabansa Malaysia (MHO), Datuk Hishamuddin Hashim madah, ejen tu ulih didawa taja pen sida nadai agi bekerejasama enggau serikat nya.

Ku iya, raban ti ditipu nya pechaya ejen ti nerang pasal skim pemeranak puku tu enti dibanding enggau serikat laban sida (ejen) orang ti dikelala sida ti ditipu.

“Anang ngumbai ejen udah bulih komisyen, udah nya lalu enda peduli laban kitai mega ulih masukka nama sida dalam ripot polis lalu kitai minta sida ejen tu mega dipansik ba baruh Seksyen 108 Kanun Keseksaan.

“Nya alai, aku meri gerah ngagai ejen, anang nguji deka ngelaku skim bula nya agi,” ku iya.

Hishamuddin bejaku munyi nya ngagai media pengudah meri penerang tambah nengah Seksyen 112 Kanun Keseksaan Tatacara Jenayah enggau surat minta perati ngagai Kepala Polis Sarawak, Datuk Mohd Azman Ahmad Sapri ba Indu Opis Polis Kontinjen (IPK) Sarawak, ditu kemari.

Dulu ari nya, MHO nerima 80 bengkah ripot ari rayat pengudah duit sida lesap ditipu sebuah serikat ti muka skim pemeranak puku ngaga rumah.

Nya alai, iya ngelalau semua rayat ti ditipu anang takut ngaga ripot polis sereta enda pechaya ke danji manis serikat ti deka mutarka isu nya ba luar.

“Kami enggai ngetu, kami deka terus munaska pekara tu, nya alai aku ngangau ke semua kita ti bedau ngaga ripot ngambi ngaga ripot polis enggau naka pengelengkas.

“Nyema kita agi nangi ketegal danji semaya ti deka mayar pulai duit, deka mutarka isu ba luar, semaya ti deka meri bayar ninting bulan enggau ke bukai, anang pechaya agi.

“Enti kitai enda mujur mutarka pekara tu diatu, ‘master mind’ nya deka majak ngereja pengawa salah nipu orang bukai,” ku iya.

Iya madah, orang ti salah nya patut diukum sereta tama jil nitihka atur undang-undang.

“Tu ukai chara nipu baka skim pemeranak puku bukai, tang tu cherita orang ti deka ngempu rumah.

“Nyema rumah ti chukup beguna ba pengidup mensia pen ditipu, kitai enda ulih ngampun ke sida,” ku iya.