KUCHING: Ejensi bekal ai Sarawak udah digerah nyikap diri napi musin angat enggau kemarau ti dipelaba nyadi nyentuk bulan Ogos tu.
Menteri Utiliti enggau Telekomunikasyen, Datuk Julaihi Narawi madah, sekeda genturung di menua tu dipelaba napi penanggul bekal ai bekau gaya hari angat enggau kemarau.
“Nyema gaya hari tu balat nyadi, nya engka ngasuh tikas ai enda deras.
“Kelimpah ari nya, nya mega dipelaba meri empas ngagai tangki ai beresi baka di Melugu, Pantu, Sri Aman, Penibong enggau Mukah enti nyema nadai ujan minggu tu,” ku iya.
Julaihi bejaku munyi nya rambau Pengerami Ngelalu Pengabang Hari Raya Aidilfitri 2023 ba rumah iya empu di Petra Jaya, ditu tadi.
Nya alai, iya madah, perintah udah ngerah ejensi bekal ai Sarawak baka Opis Bekal Ai Menua Pesisir (JBALB), Kaunsil Bekal Ai Kuching, Kaunsil Bekal Ai Sibu enggau Laku Managent nyendiaka tangki ai ba palan ti dipelaba napi penanggul bekal ai tejanggal.
