KUCHING: Menteri Komunikasyen enggau Multimedia, Tan Sri Datuk Seri Annuar Musa meminta ejensi enggau opis dibaruh Opis Menteri Komunikasyen enggau Multimedia (KKMM) di Sarawak ngiring konsep Malaysia Sebilik.
Pekara nya dipansutka iya nyerumba penemuai iya betemu enggau bala pengari ejensi KKMM, bepalan ba sebuah hotel tebilang ditu, lemai ensana.
Entara pegawai ejensi ke bisi ngambi bagi ba randau tu iya nya mungkur raban Opis Pemadah (JaPen) Malaysia Sarawak, Opis Broadcast Malaysia Sarawak (RTM), BERNAMA, Opis Pemansang Filem Nasional Malaysia (FINAS), Komiti Komunikasyen Multimedia Malaysia (SKMM), Pos Malaysia enggau Telekom Malaysia (TM) Sarawak.
Bela bisi datai Tuai Direktor Opis Pemadah Malaysia Datuk Mohd Sukari Ab. Hamid enggau Tuai Pegawai Eksekutif BERNAMA Datuk Mokhtar Hussain enggau Direktor Opis Pemadah Malaysia Sarawak, Swady Guliling.
Dulu ari nya, pejalai gawa Annuar ke Sarawak ditagaka pengelama empat hari tiga malam belabuh ari ensana.
Entara pejalai gawa ke bukai ke udah dilanggur ungkup Annuar ditu iya nya ngulu program Kembara Connectivity, betemu enggau Kepala Menteri ba Wisma Bapa Malaysia, raun ke Tanoti House Jalai Tabuan enggau ngulu Program Jelajah#Saya Digital di Dewan Serbaguna Kampung Malaysia Jaya.
Kelimpah ari nya, Annuar ditagaka ngabas Kampung Mongkos enggau Palan Internet Komuniti Tebedu di Serian sebedau ke ngulu pengerami bejadika Malaysia Sebilik diatur ba Palan Aum Borneo Kuching (BCCK).
