Ekonomi digital nyungkak pemansang

KUCHING: Pangka ekonomi digital ngagai ubah pemansang maya hari tu meri bekau ti positif lebih agi dalam nambahka kualiti pengidup enggau penatai pemisi rayat.

Ketuai Pemesai Exsekutif Serakup Multimedia Sarawak (SMA) Dr Zaidi Razak madahka taja napi pemar lebuh ngelakuka pekara ekonomi digital tang iya andal laban Sarawak udah mansang dulu ari nengeri bukai di Malaysia.

“Mayuh program digaga kami ngambika pekara pasal ekonomi digital tu terus dikerembai nyentukka ngagai sida ti diau ba menua pesisir.

“Tu nyengkaum ngatur pemansang pasal ‘Mengeri Pintar’ dalam nyaga pengelikun kualiti pengidup mensia mayuh di mengeri,” ku iya.

Zaidi bejaku munyi nya lebuh dirandau Suara Sarawak di Bengunan Yayasan ditu, pagi tadi.

Ku iya, sida mega ngelawa mayuh menua bukai ti bejalaika ubah ba pemansang teknologi enggau ekonomi ngambi penemu sereta penau.

“Kami ngelawa menua Estonia, China, Australia enggau Finland ngambi inisiatif, belajar sereta mai penemu ba menua din kitu.

“Bepanggai ba empat pelasar iya nya inisiatif ekonomi digital, inovasyen, pansik enggau pemansang sereta insfrastruktur menua pesisir, SMA ulih mantu rayat di menua tu nambahka penatai pemisi ari dagang digital,” ku iya.
Tandu iya, taja pia sida endang napi pemar dikelala mensia mayuh laban pengawa nguna teknologi kediatu enggau kelia udah enda sebaka.

“Kami ngatur 400 ngagai 500 program ti ngaul opis-opis perintah ngambika sida nemu enggau silik nama tanggungpengawa SMA.

“Pemar ti ditapi lebuh mensia mayuh enda ngelala tuju sereta objektif kami numbuhka mayuh bengkah aplikasyen ti manah endur nyaup nambahka penatai pemisi kelebih agi sida di menua pesisir,” ku iya.

Nya alai, beserimbai enggau pemujur SMA ngembuan begunan kediri ti deka dipenyadi 19 November tu ila, iya ngelaluka bala orang ti berinovasyen tauka sapa ti deka minta sanding penemu ngaul diri dalam pengawa ekonomi digital datai.

“Enda ngira sapa-sapa, nyema kita bisi penemu, runding, minta bantu tauka sanding penemu tau datai betemu enggau pemesai kami laban pekara nya beguna dikena nambahka pemasang menua,” ku iya.