Eksiden di Sadong Jaya, empat bakal lalu sebuah kerita angus

KOTA SAMARAHAN: Empat lelaki balat bakal pengudah entukar ditepan sida eksiden ba Kilometer 34 Jalai Kota Samarahan- Sadong Jaya, kemari.

Ketuai Opis Pansik enggau Penerit Adat Trafik Sarawak, Supt Alexson Naga Chabu ngenukuka penusah bebadi tu nyadi nuntung sebuah entukar Perodua Myvi ditepan tiga lelaki bela beumur 21 taun enggau sebuah entukar Proton Wira ditepan siku lelaki beumur 39 taun.

Ku Alexson, maya penusah nyadi kerita Myvi nya ba rantau jalai ari Sadong Jaya nuju ngagai Kota Samarahan.

“Ba pansik tumu, penusah nya bepun nyadi lebuh kerita Proton Wira tama ngagai jalai sepiak lebuh nguji ngelih entukar bukai ngujungka dua buah entukar nya belantak.

“Bekau ari nya, kerita Myvi ti kena lantak ari mua bepusin ke puak jalai lalu kerita Proton Wira ensayar ke tisi jalai sepiak kanan,” ku iya nengah sebengkah penerang, ditu tadi.

Ku Alexson, deriba kerita proton nya tepekul ba penuduk deriba tang mujur dipansutka peranak ti meda penusah nya sebedau entukar nya angus.

Terang iya, semua sida ti nepan dua buah entukar nya udah dibai berubat ngagai Klinik Sadong Jaya enggau Asajaya sebedau dianjung ke Sepital Besai Sarawak (SGH) ngambika diperubat silik.

Suara Sarawak