KUCHING: Eksport industri kayu ramu di Sarawak niki 26 peratus berengkah Januari nyentuk March taun tu enti dibanding enggau timpuh ti sama ba taun 2021.
Sapit Premier Sarawak ti mega Chairman Kaunsil Pengatur Pusaka Datuk Amar Awang Tengah Ali Hasan madahka eksport industri kayu ramu ungkup timpuh tu nambah ngagai RM1.04 billion ba taun 2022 ari RM826 juta ba taun 2021.
“Kitai ngarapka industri kayu ramu deka suman ke alai kitai deka meri fokus ngagai produk industri pemungkal laban industri tu chukup berega baka kereban rumah (perabot).
“Aku mega meransang raban pemain industri kayu ramu tu ulih nambahka guna teknologi dalam dagang dikena ngemanahka operasyen sida,” ku iya.
Awang Tengah bejaku munyi nya rambau Program Meri Bantu Pusaka di Balai Licha Pusaka, Wisma Sumber Alam ditu, kemari.
Ku iya ti mega Menteri Pemansang Mengeri Enggau Pengeraja Asal Kedua, nyema industri kayu ramu deka maju sida mesti ngalih ngagai bidang teknologi tinggi baka chara ti digaga menua Vietnam.
“Menua Vietnam suba mayuh ngimport kayu batang tang diatu sida udah enda ngimport agi ketegal industri ‘hiliran’ sida ngerembai jampat.
“Nya alai, Pusaka deka seruran meri lalau penemu ngagai polisi tu awakka semua raban bekaul ulih meri fokus ngagai industri ‘hiliran’ ti amat berega.
“Kitai deka nyendiaka servis pengerembai industri kayu ramu laban kitai deka ngemansangka kandang menua baka Jepak, Tanjung Manis enggau ke bukai dikena raban peribit ngerembaika industri buluh ti nerima peminta tinggi,” ku iya.
Iya nangkan nya, ngaku raban industri peribit nyadi bakih ti beguna dalam pengawa ngeluarka produk ‘hiliran’ ti berega nya.
