Ekspres Sibu-Kapit udah bejalai baru

SIBU: Berindik ari Komiti Penyangga Penusah Ngenyit Nengeri Sarawak (JPBNS) udah ngenuku Sibu nyadi zon gadung kemari (Hari Tiga), operasyen bot ekspres pejalai Sibu-Kapit berengkah bejalai baru, sehari tu.

Pekara nya dipadahka Sapit Kontroler Kaunsil Sungai Sarawak (LSS) Wilayah II Sibu, Hatta Morshidi lebuh dirandau, tadi.

Ku uya, nitihka atur standard operasyen (SOP), bot ekspres ulih bejalaika operasyen ari Sibu-Kapit laban dua bagi menua nya udah dikategorika zon gadung.

“Piak bot ekspres ulih ngepunka operasyen pejalai sida di Sibu-Kapit berengkah seharitu,” ku iya.

Apin lama ke udah, operasyen bot ekspres Sibu-Kapit diketuka dulu pengudah Sibu dikategorika zon kuning urung dua minggu je udah.

Kemari, Sapit Kepala Menteri Datuk Amar Douglas Uggah Embas ti mega Chairman JPBNS madahka Sibu dikategorika zon gadung pengudah dua minggu nadai ngerikod kes positif baru.

Apin Sibu betukar ke zon gadung, semina bot ekspres ti mai barang diguna aja dikemendar beoperasyen sereta bot ekspres ke disuwa JPBNS bagi menua dikena nganjung nembiak institusyen pelajar tinggi pulai ngagai endur diau sida di Kapit.

Perengka pengangkut sungai tetap nyadi perengka pengangkut ke diguna ngagai menua ulu Sungai Rajang.

Suara Sarawak