KUCHING: Pengawa nyeraris elaun tetap kaban kaunsil deka dibantai ba kabinet dikena nentu nilai ti engkeman, ku Sapit Premier Sarawak, Datuk Seri Sim Kui Hian.
Iya madah, Sapit Menteri Pengerai Mensia Mayuh, Pengawa Berumah enggau Perintah Lokal, Datuk Dr Penguang Manggil udah ngatur pekara nya lalu deka dibai ngagai kabinet.
“Nengah insiatif tu, kitai deka ngelala elaun ti engkeman diberi ngagai raban kaunsil seraris enggau peminta kemaya hari tu.
“Pekara tu bepelasar ke bemacham gaya baka gaya ekonomi kemaya hari, kos pengidup, gaya ba luar sereta dalam mengeri enggau ti bukai,” ku iya.
Sim mansutka jaku nya rambau ngemataka pengawa angkat sumpah Sapit Datuk Bandar Majlis Bandaraya Kuching Selatan (MBKS) ba begunan MBKS ditu, sehari tu.
Nya alai, iya ngarap kaban kaunsil ulih meri timpuh ngagai pekara nya ngambi ulih diatur meruan.
“Taja pen kita nerima mayuh ripot, ngatur bemacham program enggau aum tang bayar elaun kita agi baruh.
“Nya kebuah aku beterima kasih ngagai semua kaban kaunsil ti ransing bejalaika pangku pengawa sida,” ku iya.
