Ema gelar M.V Pulau Kidjang

Nama enggau rita M.V Pulau Kidjang tu chukup tampak tang mayuh orang enda nemu kapal nya kala digelar peranak Sarikei enggau Bintangor ngena nama Ema dulu suba.

Ex Ketuai Volunteer Rayat (RELA) Kampung Jerijeh, Bolhassan Johari, 98, madahka nama Pulau Kidjang semina suah disebut pengudah beberapa taun kapal belayar sebedau karam di Nanga Rajang kena 27 Disember 1973.

Taja pia ku iya, Ema ukai nama amat kapal nya tang semina gelar diberi orang tambang ti kala nepan dia.

“Aku mega enda nemu nama kebuah kapal nya digelar Ema. Nyangka ketegal asal penatai kapal sereta sida bedau teleba nyebut nama Pulau Kidjang.

“Nama Ema lalu lenyau pengudah nama Pulau Kidjang diangkat,” ku iya madah ngagai pengarang Suara Sarawak.

Bolhassan Johari

Nikalka kenang lebuh penusah nya nyadi, ku Bolhassan, iya nemu sepengudah sembiang dini hari.

Iya enggau tujuh raban RELA ari Sarikei berumban ngesah ngagai endur nya ngena bot lalu datai dia urung pukul 8.00 pagi.

“Aku agi ingat gaya pendiau kapal ti udah lungkup. Aku enggau bala bukai niki ke atas kapal nya. Lebuh nya, aku meda kereban melepu atas ai.

“Chukup sinu lebuh tepedaka panggal, butul susu enggau gari bala anak mit anyut ditabanka arus ai.

“Taja pia, kami nadai tetemuka bangkai tauka sida ke agi idup. Nyangka agi tepekul dalam kapal tauka udah anyut ngagai endur bukai,” ku iya ngenang.

Siku orang berikan nunjukka endur M.V Pulau Kidjang karam.

Ku Bolhassan, taja udah manggai 46 taun penusah nyadi tang gaya pendiau endur penusah mengkang dikeingat peranak dia.

Pia mega ku iya, sinu amat meda pemerinsa sida ti berambunka nyawa ngidupka seput diri lebuh nya.

“Aku bisi lima kali nepan kapal tu, bayar tambang agi RM5 ngagai Kuching, kapal ngangkut barang ti chukup likun ditepan.

“Nya kebuah aku nadai ngadang iya tau karam sereta nabanka beratus nyawa tekala nya. Tu penusah besai kala diasaika kami ditu.

“Penusah tu mega udah nabanka nyawa siku kaban belayan kami, nyentuk diatu kami agi berasai puang ditinggalka iya midang,” ku iya.

Endur tu meri kenang ke chukup sinu ngagai semua kitai.

Suara Sarawak